Butler mihimo’g record sa Bulls

CEBU, Philippines – Gibuak ni Jimmy Butler ang franchise record ni Michael Jordan alang sa labing daghang puntos sa usa ka half human siya mihimo’g 40 puntos dihang ang Chicago Bulls mi-rally aron pagpukan sa Toronto Raptors, 115-113 sa duwa nila sa NBA kagahapon didto sa Air Canada Center.

Si Butler, kinsa igo lang mihimo’g dos puntos sa first half, sa wala pa mopabuto’g  40 puntos sa second half mipuhal sa rekord ni Jordan nga 39 puntos nga iyang nahimo niadtong Pebrero 1988 batok sa Milwaukee Bucks.

Ang 26-anyos nga si Butler mihimo’g usa ka three pointer sa katapusang  30 segundos aron baswaton ang  Bulls ngadto sa dos puntos nga kadaugan batok sa Raptors alang sa ikaduhang higayon sud lang sa unom ka adlaw. 

Ang grabeng pagpamuntos ni Butler sa second half maoy rason nganong naapas sa Bulls ang ilang 15 puntos nga biya. 

“He just couldn’t miss. It was unbelievable,” matud pa sa teammate ni Butler nga si Taj Gibson. 

Ang Bullls midaog na karon og sagunson pito ka duwa batok sa Raptors nga naglakip sa ilang 104-97 nga kadaugan didto sa Chicago  niadtong Lunes. 

Ang sentro nga si Pau Gasol midugang og 19 puntos ug may 13 ka rebounds alang sa Bulls, samtang ang forward nga si Nikola Mirotic mitampo’g 17 puntos.

Ang guard nga si DeMar DeRozan maoy nangu sa Raptors sa iyang 24 puntos, apan misipyat siya sa iyang buzzer-beating shot nga mao unta’y mopadaog kanila. 

Sila si Luis Scola ug   Kyle Lowry parehong miamot og 22 puntos  alang sa Raptors.  

Nagtabla ang iskor, 109-all human sa turnaround shot ni Lowry aron molabaw ang Raptors og dos puntos, 111-109 sa nahabiling 40.9 segundos, apan si Butler mituhog og tres   aron mabawi ang labaw, 112-111 sa katapusang 30.6 segundos sa duwa.

Misipyat si Lowry sa iyang running lay-up ug gitawgan og foul si DeMarre Carroll batok kang Gasol, kinsa igo lang nakahimo’g usa ka free throw alang sa 113-111 nga labaw sa katapusang 23 segundos. Sa  sunod nga ball possession sa Bulls, nakahimo sab og usa ka free throw si Gibson alang sa tres puntos nga bentaha. 

Midaog ang Bulls nga wala ang ilang duha ka star players nga silang Derrick Rose ug Joakim Noah. 

Sa laing bahin, dili na makatiwas og duwa karon nga season si Jarrett Jack sa Brooklyn Nets human siya makaangkon og injury nga ‘torn ligaments’ sa iyang tuong tuhod.

Ang 32 anyos nga si Jack operahan aron maayo ang maong piang. 

Napiang sab si Kenneth Faried sa Denver Nuggets, apan nagkanayon siya nga maayo na ang iyang pamati human sa iyang neck injury nga iyang naangkon atol sa ilang kapildihan batok sa  Golden State Warriors niadtong Sabado didto sa Oakland.  

Ang laing star nga   si Kobe Bryant napiang sab, apan midaog gihapon ang Los Angeles Lakers batok sa Phoenix Suns, 97-77. 

Sa laing duwa,    ang New York Knicks mibuntog sa  Atlanta Hawks sa iskor nga 111-97. (BANAT NEWS)