CEBU, Philippines – Sa ikalimang sunod-sunod nga tuig, si Cebuana long distance running star Mary Joy Tabal milampus pagdepensa sa iyang trono sa 5K women's open sa Sinulog Fun Run kagahapon didto sa Cebu City Sports Center.
Ang rayna sa Philippine marathon mitabok sa finish line sa labing paspas nga oras nga 18 minutos ug 21.58 segundos.
Bisan og wala niya mabuak ang personal best time niyang 17:55, gibiyaan gihapon ni Tabal ang labing sikit niyang kaatbang nga si Ruffa Sorongon, nga mipahiluna sa ikaduhang dapit sa oras nga 19:11.58.
Si Mary Joy Loberanis nalandig sa ikatulong puwesto sa oras nga 19:49.09, samtang ang managsoong Cherry ug Lovely Fe Andrin mikapyot sa ikaupat ug ikalimang dapit sa oras nga 20:20.80 ug 21:10.11.
Naglangkob sa top 10 mao sila si Kisha Mae Delechos (21:31.81), Geniecel Saballa (22:29.30), Saralee Cuizon (22:39.63), Michelle Ann Beboso (23:33.60) ug Mary Joy Castor (23:47.01).
Sa men's division, ang gikaintapang mga Kenyans maoy miharos sa top 3 ubos sa pagpangu ni Eric Kibiott Chepsiror sa oras nga 15:25.08. Nagsunod ang iyang mga kababayan nga sila si Abrahan Kilimo (15:26.02) ug Joseph Mururi (15:49.01).
Ang Sugbuanong si Prince Joey Lee igo lamang nakataak sa ikaupat nga luna sa oras nga 16:07.28, samtang si Michael Largo maoy ikalima sa oras nga 16:39.90.
Nakakumpayot sa top 10 mao sila si Arnel Florentino (16:50.30), Bonifacio Monjas (16:59.80), Rafael Pescos (17:05.01), Chobie Duenas ug Francis Kakui (17:13.80). (BANAT NEWS)