Bulls misungag sa Raptors
CEBU, Philippines – Si Tony Snell miiskor og 16 sa iyang 22 puntos sa fourth quarter aron baswaton ang Chicago Bulls ngadto sa kadaugan batok sa Toronto Raptors, 104-97 sa nagpadayong aksiyon sa National Basketball Association kagahapon didto sa United Center sa Chicago, Illinois.
Ang Bulls nagtangag na karon og 12-5 nga baraha sa ilang homecourt ug adunay 17-12 record sa Eastern Conference.
Silang Pau Gasol, Derrick Rose ug Snell nagkumboya og 64 puntos. Si Gasol midaro sab og 22 puntos, samtang si Rose adunay 20 puntos uban ang upat ka assists. Si Rose mikulit sa iyang ‘back-to-back’ 20 point games sa labing unang higayon karon nga season.
“It started with him. You can tell he’s getting his legs where he wants them. Hopefully that’s the Derrick Rose we’ll see from here on out. We’re a pretty good team when we can attack with that type of pace,” matud pa ni Bulls coach Fred Hoiberg.
Ang guwardiya sa Raptors nga si Kyle Lowry miposa og 28 puntos aron maoy mangu sa koponan. Laing guwardiya nga si DeMar DeRozan miamot og 19 puntos, walo ka rebounds ug walo sab ka assists alang sa Raptors nga nagbitbit na karon og 19-13 nga baraha.
Ang Toronto napilde na og unom ka sagunson ka higayon batok sa Bulls. Wala sila modaog batok sa Bulls sukad niadtong Disyembre 2013.
Si Snell maoy mitabang sa Bulls aron mainat ang ilang labaw ngadto sa double digits sa final quarter. Ang iyang drive batok kang Terrence Ross ug lay-up batok ni forward Luis Scola maoy naghatag sa Bulls og 84-74 nga abante sa nahabiling 9:22 sa duwa.
Si Jonas Valanciunas, kinsa mao pa’y pagbalik og duwa human mapalta og 17 ka higayon miamot og nuybe puntos alang sa Raptors. Aduna siya’y four-of-seven shooting sud sa 21 minutos niya nga pagduwa.
Sa lain pang mga duwa, ang Golden State Warriors milubong sa Sacramento Kings, 122-103, gipilde sa Los Angeles Clippers ang Washington Wizards, ang Charlotte Hornets mipukan sa L.A. Lakers, 108-98, midaog sab og 10 puntos ang Dallas Mavericks batok sa Milwaukee Bucks, 103-93,
Gilat-an sa Orlando Magic ang New Orleans Pelicans, 104-89, ang Brooklyn Nets mipukan sa Miami Heat, 111-105, ang Indiana Pacers mibihag sa Atlanta Hawks, 93-87.
Ang Cleveland Cavaliers ni LeBron James midaog batok sa Phoenix Suns, 101-97 ug ang Utah Jazz nakaipsot batok sa Philadelphia Sixers, 95-91. (BANAT NEWS)
- Latest
