CEBU, Philippines – Wala na ipadayon sa Barangay Ginebra San Miguel ang ilang bahad nga mosang-at og protesta ngadto sa PBA Commissioner’s office human sa ilang kontrobersiyal nga kapildihan ngadto sa GlobalPort Batang Pier, 83-84 sa quarterfinals sa PBA Philippine Cup niadtong Domingo.
Ang Ginebra coaching staff ug fans nag-wild human sa maong duwa kay wala tawagi og five second violation ang guwardiya sa GlobalPort nga si Stanley Pringle nga mohatag unta nila sa posisyon ug kahigayonan nga makawat ang daog.
Si PBA media bureau chief Willie Marcial mikompirmar nga wala’y miabot nga protesta gikan sa Ginebra human sa 12 ka oras nga deadline nga nagpasabot nga gidawat na sa koponan ang ilang kapildihan.
Ang PBA mihatag og kahigayonan sa Ginebra nga mopadangat og protest letter uban ang P20,000 aron sugdan nila ang imbestigasyon sa resulta sa maong duwa, apan wala na kini buhata pa sa koponan.
Sa gipagawas hinuon nga pamahayag sa PBA, si Commissioner Chito Narvasa mipatawag sa upat ka reperi nga sila si Aquino, Rommell Gruta, Mardy Montoya ug Bing Oliva nga maoy midala sa maong kontrobersiyal nga duwa.
Tungod niini, gipaabot nga mohimo og imbestigasyon ang Commissioner’s office ug gipaabot nga adunay ipakanaog nga desisyon. (BANAT NEWS)