CEBU, Philippines – Gipalig-on pa sa Alaska Aces ang ilang kupot sa automatic semifinals berth human sa ilang 108-100, kadaugan batok sa Barako Bull Energy Cola sa 2015 PBA Philippine Cup kagahapon didto sa Smart Araneta Coliseum.
Ang Alaska nagbitbit na og 9-2 nga baraha diin nakigtabla sila sa San Miguel Beermen sa unang dapit.
Kun ugaling modaog ang Rain or Shine (8-2) sa katapusan nilang duwa, ang Aces ug Painters ang mahatagan sa automatic semis.
Tungod kay krusyal ang maong daog, ang Aces migamit sa ilang balanse nga ataki ug hugot nga depensa aron masumpo ang gitinguhang ‘back-to-back’ nga kadaugan sa Barako.
Biya og singko puntos, 36-41, sa second period, ang Alaska sa pagpangulo ni Calvin Abueva ug Vic Manuel milusad og rally aron biyaan nila ang Barako, 74-62 sa nahabiling 2:34 sa third period.
Misikit hinuon ang Barako sa katapusang kuwarter, 90-92, apan subling nanginit si Manuel ning higayona uban ni RJ Jazul aron inaton pagbalik ang labaw, 105-95 sa katapusang dos minutos sa duwa ug wala na kini molingi pa sukad niadto.
Sa laing bahin, ang Mahindra Enforcers makigharong sa Blackwater Elite sa alas-3 sa hapon ug sundan dayon sa sangka tali sa Barangay Ginebra San Miguel ug Talk ‘N Text Tropang Texters sa alas-5 sa hapon didto sa Mall of Asia Arena. (BANAT NEWS)