Automatic semis berth tuyo sa Rain or Shine
CEBU, Philippines – Dili mokompiyansa ang Rain or Shine Elasto Painters sa ilang duwa karon batok sa Meralco Bolts tungod kay giisip kini nila nga usa kini ka delikadong kontra sa PBA Philippine Cup didto sa Smart Araneta Coliseum.
Magmatngon si coach Yeng Guiao sa ilang sangka batok sa Meralco karong alas-4:15 sa hapon tungod kay kuyaw nga mangamong ang koponan ni Norman Black nga wala na’y purohan pang makasulod sa playoffs.
Ang Painters (7-2) nga nag-apas pa sa automatic semis berth makigharong sa Bolts nga una nang natagak sa elimination sa ilang 1-9 nga baraha.
Krusyal ang daog karon alang sa Rain or Shine tungod kay kun maharos nila ang nahabiling duha ka duwa, may purohan sila nga makuha pa ang unang dapit sa standing ug luna sa semis.
Human sa Meralco, ang Painters moharong sa NLEX Road Warriors alang sa katapusan nilang duwa sa maong conference.
Sa main game sa alas-7 sa gabii, ang kasamtangang No. 1 seed nga San Miguel Beermen (9-1) makigbatok sa Alaska Aces (7-2) sa laing krusyal nga duwa.
Uban sa Rain or Shine, ang defending champion San Miguel ug Alaska mao ang tulo ka koponan nga naglumba karon sa duha ka luna sa semis. (BANAT NEWS)
- Latest
