Alaska, Rain or Shine mopaduol sa semis
CEBU, Philippines - Magkuros ang dalan sa duha ka powerhouse teams Alaska Aces ug Rain or Shine Elasto Painters diin pulos silang nagtinguha nga mopaduol sa semifinals sa PBA Philippine Cup didto sa Smart Araneta Coliseum.
Ang Painters ug Aces magtakus sa alas-7 sa gabii human sa sangka tali sa Blackwater Elite ug Barako Bull Energy nga sugdan karong alas-4 sa hapon.
Ang San Miguel Beermen usa sa mga koponan nga hayag na kaayo alang sa automatic semis berth dihang sila ang nag-una sa standing sa ilang 8-1 win-loss record. Nagsunod ang Aces (7-1) ug Painters (6-2) diin anaa sa duha ka koponan ang kahigayonan nga makakuha usab og luna sa semis.
Si Painters coach Yeng Guiao miingon nga krusyal ang kadaugan batok sa Aces tungod kay gawas nga mosaka sila sa ikaduhang dapit, makita usab kun unsa sila kaandam batok sa usa ka contender sama sa Alaska.
Hinuon si Alaska coach Alex Compton miangkon nga usa ang Rain or Shine sa mga giisip nilang labing delikadong kaatbang tungod sa kahait sa opensa niini.
Tungod niini gitahasan ni Compton sila si Calvin Abueva, JV Casio, Vic Manuel ug Sonny Thoss aron mopakita sa katakus sa depensa batok sa Painters. (BANAT PALARO)
- Latest
