CEBU, Philippines – Mikadlit og 25 puntos si James Harden dihang gipukan sa Houston Rockets ang Dallas Mavericks, 100-96 sa duwa nila sa National Basketball Association kagahapon didto sa American Airlines Center sa Dallas, Texas.
Misipyat una si Harden og tulo sa iyang unang 12 ka tira sa wala pa mohimo’g 7 of 11 lakip ang krusyal nga jumpshot nga maoy naghatag sa Rockets og kuwatro puntos nga labaw sa nahabiling siyete segundos sa duwa.
Ang All-Star guard nga si Harden mihimo sab og walo ka rebounds ug siyam ka assists lakip ang iyang pasa ngadto kang Terrence Jones, kansang hansak maoy naghatag kanila’g 98-96 nga labaw sa katapusang uno minuto.
Si Trevor Ariza, kinsa mihimo’g 4 of 7 gikan sa long range, midugang og 18 puntos alang sa Rockets, samtang si Jones miamot og 17 puntos.
Si Deron Williams mipabuto og 22 puntos lakip ang unom ka assists aron pangulohan ang Mavericks, apan siya sab maoy nanag-iya sa walo sa 17 ka turnovers alang sa Dallas.
Taas ang pahuway nga gihatag ni Dwight Howard apan nakahimo lang gihapon og 15 ka offensive rebounds ug 18 ka second-chance points alang sa Rockets ni interim coach J.B. Bickerstaff, kinsa aduna na’y 5-4 nga baraha sukad siya mopuli ni Kevin McHale.
Si Dirk Nowitzki miamot og 16 puntols ug may 10 ka rebounds alang sa Mavs ug si Devin Harris mitampo’g 13 puntos.
Sa laing mga duwa, ang New Orleans Pelicans mipukan sa Cleveland Cavaliers pinaagi sa overtime sa iskor nga 114-108.
Si Anthony Davis maoy nangu sa Pelicans sa iyang 31 puntos ug 12 ka rebounds, samtang ang Cavs gipangulohan ni LeBron James nga miburak og 37 puntos ug walo ka assists.
Midaog sab ang New York Knicks batok sa Brooklyn Nets, 108-91, ang Washington Wizards mibuntog sa Phoenix Suns, 109-196, ang Detroit Pistons mitumba sa Milwaukee Bucks, 102-95 ug ang Atlanta Hawks mibihag sa Los Angeles Lakers, 100-87. (BANAT NEWS)