City Sports milusad programa sa triathlon

CEBU, Philippines – Ang City Sports Club-Cebu (CSCC) pormal nga milusad kagahapon sa komprehensibo nilang programa sa triathlon diin ang nag-unang tinguha mao ang paghatag sa ilang mga miyembro og paagi nga mapiskay sa kanunay ang ilang panglawas pinaagi sa maong matang nga paugnat sa kusog.

Mitambong sa maong kalihukan mao sila si CSCC Board Director Peter Militante,  Bernard Bonn Sia, miyembro sa CSCC nga usa sab ka triathlete, si  fitness coach Pio Gerardo Solon sa Epic Performance Fitness  ug Rey Fuentes sa City Sports.

Matud pa ni Sia nga dili ang pagdaog nungka nga maka-podium finish sila sa matag higayon nga mosalmot sila og karera maoy ilang katuyoan sa paghulma sa maong programa.

Ang ilang programa naglangkob og serye sa mga lecture ug seminar nga mosikad pinaagi sa Triathlon 101 course sa Pebrero 20 sunod tuig. Mga mahinungdanong aspeto sa triathlon ang tukion sa maong sesyon. Pagasundan kini sa usa ka 'Sports Nutrition' seminar sa Pebrero 27.  Lain pang teknikal nga bahin sa maong 3-in-1 sport ang tukion sa serye sa ilang seminar ug lecture nga gikatakda sa Mayo hangtod sa Hulyo 2016.

Gipadayag sab ni Sia nga gusto sab sila makaporma og lig-on nga Team City Sports alang sa makasaysayanong Asia-Pacific Ironman Championships dinhi sa Sugbo sa bulan sa Agosto sunod tuig. (BANAT NEWS)