Alcoseba naka-gold na sab
CEBU, Philippines – Taliwala sa kabugnaw sa tubig, pabiling nanginit si Raven Faith Alcoseba aron pagtunol og dugang duha ka bulawang medalya sa Cebu Province sa swimming event sa Philippine National Youth Games-Batang Pinoy National Championships kagahapon didto sa Cebu City Sports Center.
Human milabnot og duha ka bulawang medalya sa unang adlaw, ang garbo sa mga Talisaynon nga si Alcoseba nakamina na sab og kaluhang gold sa 100m backstroke sa oras nga 1:10.14 ug sa 400m individual medley diin siya dominante kaayo human gibiyaan og distansiya nga 25 metros ang labing sikit niyang kontra.
Ang host Cebu City nakadaog na sab og gold kortesiya sa ilang ‘adopted’ swimmer nga si Jo Lander Molina. Ang taga Loon, Bohol nga si Molina mikulit og meet record sa 200m breaststroke sa oras nga 2:57.11.
Kutob lamang sa bronseng medalya ang nakab-ot sa lain pang duha ka pambato sa Team Cebu City nga sila si Karen Mae Indaya ug Justin Reign Garrido. (BANAT NEWS)
- Latest
