Rain or Shine mibalik sa unang dapit sa standing
CEBU, Philippines – Mitungtong balik sa unang dapit sa standing ang Rain or Shine Elasto Painters dihang ilang gilubong ang Blackwater Elite, 103-81 sa PBA Philippine Cup kagahapon didto sa Cuneta Astrodome.
Ang Rain or Shine nakigtabla karon sa San Miguel Beermen ug Alaska Aces sa unang dapit sa managsamang 5-1 win-loss records.
Mga bench players ang mibida sa Painters diin ilang topscorer mao si Jericho Cruz nga mipintal og 23 puntos, samtang si Jewel Ponferada miamot og 15 puntos.
Milabaw og 10 puntos ang Painters sa first half, 43-33, apan wala mapugngi sa Elite ang kalit nga pagbugwak og puntos sa Rain or Shine sa second half diin gibiyaan sila og 19 puntos, 80-61 paingon sa final period.
Ang Blackwater hayan nga dili na usab makasulod sa playoffs human sila matagak 1-5 win-loss record. Nangulo sa Blackwater mao ang rookie nga si Art Dela Cruz nga miiskor og 15 puntos. (BANAT NEWS)
- Latest
