CEBU, Philippines – Andam na ang tanan alang sa ‘Race for Nilo Barbalose Cycling Challenge’ sa Disyembre 6 didto sa Toledo City.
Si Keith DeFiebre, kanhi tadhang downhiller nga usa na karon ka race director didto sa Amerika, maoy nagpasiugda sa maong charity event diin ang makabenepisyo mao si Barbalose, nga nanginahanglan og tabang pinansiyal human maaksidente. Nakarekober na siya, apan gitambagan nga dili na molumba pa gumikan sa iyang kondisyon.
Si DeFiebre ug Barbalose nagkaila upat ka tuig na ang milabay ug atol sa taas nga dagan sa ilang panaghigalaay, si DeFiebre nakakat-on og daghan pagtulon-an gikan sa Sugbuanong seklista kabahin sa mountainbike ug road race. Gusto sab ni DeFiebre nga mohatag og balik sa lokal nga mga seklista nga maayo kaayo ngadto kaniya. Nunot niini, miabot ngadto sa P140,000 nga ganting salapi ang gigahin ngadto sa mga mananaog.
Sa labing unang higayon, ang mga babayeng entrante makadawat og susamang premyo sa mga lalaki.
Ang maong lumba usa ka criterium event sa racer ug mountainbike discipline. Mga kategoriya nga tigian mao ang juniors, golden, men's 19-44, 45-above, women's junior ug ang men ug women's open. (BANAT NEWS)