14-0 na ang Warriors

CEBU, Philippines – Giinat sa Golden State Warriors  ang ilang winning streak ngadto sa 14-0 human nila ihawa ang Chicago Bulls, 106-94 sa nagpadayong duwa sa NBA  kagahapon didto   sa Oracle Arena sa Oakland, California.

Usa na lang ka daog ang kinahanglan sa Warriors  aron ilang  matabla  ang  best start sa NBA season.

Pinangulohan sa 27 puntos ni Stephen Curry, natabla na sa Warriors ang best start sa usa ka defending champion nga gihimo  sa Boston Celtics, 14-0  niadtong 1957-1958

Kun  modaog ang Warriors  batok sa Denver Nuggets ugma, ila na sab matabla ang best start nga 15-0 nga nahimo kaniadto sa 1948-1949 nga Washington Capitols ug sa   Houston Rockets niadtong 1993-1994.

Posible pa   molanat ngadto sa 16-0  sa ila unyang pag-host sa Los Angeles Lakers sa Miyerkules.

Ang Bulls nakamaneho og 23-12 sulod lang sa pito ka minutos sa first period, apan dali kaayo kining napapas sa Warriors.

Ang Golden State ug Chicago nalambigit og 18 ka lead changes ug 17 ka deadlocks, apan ang Warriors nakahimo’g 77-73 nga labaw didto sa fourth quarter. Apan bisan pa niana, wala gihapon moatras ang Bulls tungod kay kinahanglan pa sa Warriors ang three-pointer ni Curry aron mabuak ang panagtabla sa nahabiling  5:26. Mitubo pa kini human sa back-to-back triples ni Harrison Barnes sa katapusang 1:15 sa duwa.

Mao na kadto ang ika-26 nga sagunson nga daog sa Warriors sa ilang homecourt sa regular season.

Si Barnes midugang og 20 puntos uban sa iyang siyam ka  rebounds.

Ang shooting guard nga si Klay Thompson miposa og 15 puntos alang sa Warriors.

Si Jimmy Butler maoy nangu sa Bulls sa iyang 28 puntos uban sa siyam ka rebounds ug pito ka assists.  Si Nikola Mirotic  midugang og 18 puntos, samtang si Pau Gasol adunay 10 puntos.  (BANAT NEWS)