CEBU, Philippines - Ang Megabond nakalingkawas batok sa Davies Paints, 77-73, alang sa ikawalo nilang sagunson nga daog sa Architects+Engineers Basketball Association’s 1st Corporate Cup didto sa University of San Carlos main gym.
Si Neil Tequin miratsada og 22 puntos alang sa Megabond, nga mao na lang ang bugtong wa’y pilde sa unom ka entranteng mga koponan.
Si Malvin Malicdem midugang og 13 puntos sa Megabond, nga naglabaw lamang og sayes puntos sa halftime, 29-35.
Mibawos ang Davies Paints sa ikatulong kuwarter hinungdan nga nakasikit sila, 51-53, apan wala sab magpabitin ang Megabond nga nagpabiling kalmado sa krusyal nga bahin dayon na ngadto sa pagkulit niini og kuwatro puntos nga kadaugan.
Si Michael Cinco mitapos og 21 puntos, alang sa Davies Paints nga misukarap sa ikawalo niining pilde nga giatbangan og duha ka daog.
Sa laing mga duwa, ang Fenestram mipakgang sa CMI, 68-55, samtang ang Dorma milampurnas sa Phoenix, 80-57.
Ang Dorma ug ang CMI nagsawo na karon sa ikaduhang puwesto sa managsamang 5-3 win-loss records, samtang ang Fenestram nagtangag og 4-4 nga baraha. Ang Phoenix pabiling nangitlog human sa walo ka duwa.