CEBU, Philippines – Nidaog na gyud ang Triple-A sa ligas kaayo nila nga duwa batok sa Allied, 48-47 sa Triple-A Christmas League 2015 basketball tournament niadtong Domingo didto sa Kimwa gym sa Barangay Subangdaku, Mandaue City.
Higpit kaayo ang duwa gikan sa pagsugod hangtod nahuman hinungdan nga nagdaog lang kini og uno punto.
Ang three-point artist nga si Geryl Bukiron mao na sab ang nangu sa Triple-A nga miburak og 11 puntos, lakip ang tulo ka 3-pointers. Gawas ni Bukiron, 12 sab niya ka teammates ang nakaiskor alang sa balanseng opensa sa Triple-A nga misakmit sa labing una nilang daog sa upat ka duwa.
Si Gilbert Lesin mao sab ang topscorer sa Allied, kansang limpiyong rekord nabulingan. Bisan pa niini, ang Allied pabilin gihapon nga nag-una sa standing uban sa Limasawa sa managsamang 3-1 win-loss records.
Ang Limasawa milansang sa ilang ikatulong daog pinaagi sa paglubong sa Gallego, 59-47.
Wala na sad magpapugong si playing coach Redyn Villaronza, kinsa mikamada’g 11 puntos aron pangulohan ang Limasawa. Si Villaronza gitugahan sab og suporta gikan nilang Adrian Gogo, Gerjam Armamento ug SPO2 Junjun Sabang nga pulos mikadlit og 10 puntos.
Si Rey Gonzaga maoy nangu sa Gallego sa iyang 12 puntos.
Puntos Matag Usa
Unang duwa:
LIMASAWA (59) – Villaronza 11, Gogo 10, G. Armamento 10, Sabang 10, Ontong 8, Yares 3, Armamento 2, Cabucos 2, Cardoza 2, Rodriguez 2.
GALLEGO (47) – Gonzaga 12, Grafe 9, Flores 6, Bordaje 5, Carvajal 5, N. Ybañez 4, J. Ybañez 2, Pastoriza 2, Jacalan 2.
Ikaduhang duwa:
TRIPLE-A (48) – Bukiron 11, Monterde 8, Yu 6, Monternel 5, Romagos 5, Damolo 2, Gacasan 2, Gulbin 2, Nova 2, Taborada 2, Dicdican 2, Lurica 1.
ALLIED (47) – Lesin 12, Madrid 9, Budiongan 7, Catinoy 7, Mendoza 6, Secad 4, Luga 2. (BANAT NEWS)