AC Troopers nakaeskapo batok Luigi

CEBU, Philippines – Nakalingkawas ang AC Troopers sa higpit nga gubat batok sa Luigi-Sebandal, 58-57 sa ilang ‘non-bearing’ game sa pagtapos sa elimination round sa second conference sa LABA President’s Cup 2015 basketball tournament niadtong Biyernes didto sa Banilad Sports Center, dakbayan sa Mandaue.

Si Joel Cabahug maoy nangu sa bangis nga pangataki sa AC Troopers ni team owner SPO4 Dondon Coloscos nga mirakrak og 18 puntos, diin ang 11 niini iyang nahimo sa first period.

Mipakitang gilas sab si Pedot Dakay, kinsa miburak og 13 puntos alang sa AC Troopers nga mitala sa labing daku nilang labaw, 38-17 sa hinapos nga bahin sa second quarter.

Mihiyos hinuon ang labaw ug nahulga pa ang AC Troopers dihang nakatabla ang Luigi, 50-all human si LABA presidente Gilbert Sebandal mipasud sa ikatulo niyang 3-pointers sa katapusang 4:00 sa duwa.

Napalabaw pa ni Sebandal ang Luigi, 53-52 sa nahabiling 2:45, apan gitubag sab dayon kini ni Dakay pinaagi sa sunod-sunod nga baskets aron ilogon pagbalik ang labaw, 56-53.

Ang high-leaping nga si Eman Pacquiao, kinsa naningkamot aron makabawon og daog sa ilang pagpanamilit sa maong conference mibugha og 25 puntos aron pangulohan ang Luigi, samtang si konsehal Sebandal mitusak og 17 puntos.

Ang mga duwa gidumala ni league commissioner Geryl Bukiron, inabagan nilang Lloyd Chavez ug Ramil Baclay.

Puntos Matag Usa

AC TROOPERS (58) –  Cabahug 18, Dakay 14, Cornejo 8, Jacalan 8, Coloscos 4, Englis 2, Migallen 2, Beldera 2.

LUIGI-SEBANDAL (57) – Pacquiao 25, Sebandal 17, Orendain 5, Ubas 4, Buliag 4, Duhaylungsod 2. (BANAT NEWS)