Duron 2nd overall sa ASEAN Cup

CEBU, Philippines – Ang Sugbuanong rider nga si Jun Duron mitapos sa ikaduhang dapit sa ikaupat ug katapusang leg sa 2015 ASEAN Mountainbike Cup  sa miaging adlaw didto sa Timor Leste.

Ang garbo sa mga Talisaynon nga si Duron mitapos sa lumba sud sa 58 minutos ug 24.35 segundos nga igo kaayong naghatod kaniya og silver medal.  Si Jacinto de Costa sa Timor Leste maoy milabnot sa bulawang medalya sa oras nga 57:24.26.

Sa kinatibuk-an sa maong serye, si Duron maoy second overall. Sulagma kaayo nga mipahiluna sab siya sa ikaduhang puwesto sa Timor Leste International Mountainbike Challenge nga gipahigayon dungan sa  final leg sa ASEAN Cup.

Si Duron maoy bugtong  Sugbuanon  nga nakakumpleto sa four-leg ASEAN Cup. Nunot niini, naglantaw  siya  sa   mas lisud  ug  kulbahinam nga edisyon sa maong tinuig nga karera sa 2016. (BANAT NEWS)