CEBU, Philippines - Walay hago nga mikulit sa ilang ikaupat nga daog ang San Roque Ball Club (SRBC) ni Duke Espina dihang miduwa ang Taskforce Gilas nga wala makaabot og 10 ka players ug midaog sila pinaagi sa default kaniadtong Huwebes sa gabii sa nagpadayon nga BOC Friendship Cup Christmas League basketball tournament didto sa barangay Tinago gym, ning dakbayan.
Sa main game, gipatilaw sa Alin Customs Brokerage sa ilang ikaduhang pilde sulod sa lima ka duwa ang Kentkyle Cuisine, 80-66 aron makigtabla sa ikatulong pwesto sa parehong 3-2 nga baraha.
Usa na lang ka daog, pormal nang moabante sa top four ang SRBC ug mao kini karon ang gipangandoy ni Espina kinsa nagkanayon nga dako na niyang kalipay kung dili sila matagak tungod kay pulos lig-on ang moabante sa top four nga pulos iya sab makontra sa semifinals.
Sa laing bahin, Si Jerome Sanguenza maoy nangu sa Alin Brokers sa iyang 14 puntos samtang may 12 puntos si BOC president Ryan Barral. Parehong midugang og 11 puntos matag usa silang Ryan Villomo ug Julius Tarona ug may 10 puntos si Francis Palero alang sa Alin kinsa didto na manginit og maayo sa fourth period.
Sama sa naandan, si ex-CIT forward Ramil Aninon maoy nangu sa Kentkyle sa iyang 15 puntos apan wala nay laing teammates nga mibahug og double figures.
Gawas sa 5-0 nga CEI kinsa segurado nang moabante sa top 4, ang laing ubat ka teams nga nanikay-sikay aron moabante sa semifinals mao ang Alin Brokers, Duke-SRBC, MP Brokers ug Kentkyle Cuisine.
Ang segurado nang matagak sa walo ka teams mao ang guest team Alburo Brokers (0-5) nga gipangulohan ni kanhi USPF Panthers power forward nga si Elvis Labares, Taskforce Gilas (1-4) ug ang 1-4 nga Chambers of Customs Brokers, Inc. (CCBI) diin usa sa mga players mao ang kanhi The Freeman telephone operator nga si Roel Labrador.
Puntos matag usa:
Alin Brokers (80) — Sanguenza 14, Barral 12, Villomo 11, Tarona 11. Palero 10, Filoteo 8, Perolino 6, Singson 4, Alin 2, Cayanong 2.
Kentkyle (66) — Aninon 15, Taborada 9, Villa 6, Tan 5, Monteno 6, Manlosa 4, Mose 4, Maningo 4, Oporto 3, Dungog 3, Generalo 2, Quilantang 2. —(BANAT NEWS)