CEBU, Philippines - Gatosan ka mga triathletes ang magpalabwanay sa ilang abilidad sa 2015 San Remigio 8080 Triathlon nga mosikad na karong adlawa.
Ang lumba nga gipasiugdahan sa Cornerstone Group sugdan sa alas 12:30 sa hapon.
Mas taas sa Olympic distance ang rota niini, apan mas mubo sa Ironman 70.3. Ang full distance naglangkob og 1.8 km. swim, 65 km. bike ug 14 km. run.
Si Paul Jumamil sa Alaska Tri Aspire maoy top contender sa men’s division ilabi na kay siya maoy midominar sa Safeguard for Men 5i50 Triathlon sa miaging semana didto sa Bellevue Resort sa Panglao, Bohol. Mohagit kaniya sa titulo mao ang pambato sa Sugbo nga sila si Kristianne Lim ug Jory Ycong.
Gipaabot sab nga hugot ang kumbati ang masaksihan sa women’s category. Gawas sa elite, kumbatihan sab ang nagkadaiyang age groups ug ang relay event.