CEBU, Philippines - Ang Cebu Movers System, Inc. miposte’g 2-0 nga baraha human gipilde ang Boss John, 75-61 sa 1st Game On ‘Warriors Cup’ basketball tournament didto sa Cebu Coliseum.
Si Aries Magdales mikulit og 22 puntos, sila si Efraim Oporto ug Lester Dajao parehong midugang og 15 puntos, samtang si Christian Palima mitikdol og 12 puntos sa maong kadaugan. Ang Cebu Movers ni playing coach Dr. Boy Te biyaan pirme sa unang duha ka kuwarter ug didto na sila nakabawi sa third period. Human matabla ni Magdales ang iskor, 48-all sa nahabiling 1:10 ang oras sa maong kuwarter, wala na makarekober pa ang kontra.
Ang Boss John gipangulohan ni Aldred Du sa iyang 16 puntos, gisundan ni Dustin Yao nga adunay 15 puntos.
Sa laing duwa, midaog ang Shohuko 5.0 batok sa Cebu Bai.com sa iskor nga 72-66. Ang higante nga si Joseph Jayme maoy nangu sa Shohuko 5.0 sa iyang 31 puntos, samtang ang Cebu Bai.com gipangulohan sab ni Roger Tauza sa iyang 15 puntos. (BANAT PALARO)