CEBU, Philippines – Bulawang medalya maoy pangandoy sa Muay Thai team sa Sugbo sa ilang pagsalmot sa 2015 Philippine National Games sugod ugma didto sa San Jose, Antique.
Human sa malampusong kampanya sa ilang kids team sa Batang Pinoy National finals niadtong Hulyo didto sa Bulacan, turno na sab karon sa mga junior ug adult kickboxers aron ipakita ilang katakus sa Muay Thai.
Gawas sa combat tournament, ang Team Cebu mosalmot usab sa Wai Khru o Muay Thai dance.
Ang 20-man team nga ubos sa giya ni Muay Thai Association of the Philippines-Visayas head Master Benigno ‘Ekin’ R. Caniga Jr. pulos produkto sa combat grassroots program sa Cebu City Sports Commission.
Lakip sa maong koponan mao ang tulo ka mga amateur mixed martial arts fighters nga sila si Jed Alvarez, Roy Bajar ug Rhyle Lugo, samtang ang veteran Yaw-Yan ArDigma fighter nga si Ruel Rosauro mobida usab sa adult class. (BANAT NEWS)