CEBU, Philippines - Ang Convergys Converters ug ang Teleperformance All Stars mitagak sa tagsa-tagsa nila ka mga kontra aron maoy magsangka sa kampiyonato sa 11th CSCC E-League men’s basketball tournament niadtong Domingo didto sa City Sports Club-Cebu gym.
Ang Converters mipalagpot sa Lexmark Stallions, 71-68, samtang ang All Stars mipilde sa Accenture Sharks, 83-77.
Migamit og balanseng atake ang Converters aron pagwani sa Stallions diin lima ka players niini ang miduslit og double figures nga gipangulohan ni Franz Dione Dysam nga adunay 19 puntos. Si Sherwin Resilla miamot og 12 puntos.
Si Lourenz Limpangog miiskor sab og 12 puntos alang sa Converters nga mipabarag sa Stallions human milabaw og 18 puntos sa halftime, 45-27.
Sila si Kenneth Dysam ug Angelo Lucero mihipos og 11 puntos matag usa sa Converters.
Sa laing bahin, si Dean Junber Escalon mipatuasik og 20 puntos, samtang si Karlo Rafael Miñoza midonar og 17 puntos sa Teleperformance.
Miabag kanila si Rodulfo Enterina III nga adunay 14 puntos.