Convergys, Teleperformance nakauna sa E-League semis
CEBU, Philippines – Ang Convergys Converters ug Teleperformance All Stars mipakaging sa tagsa-tagsa nila mga kontra pagsugod sa best-of-three Elite Classic semifinals sa CSCC E-League men's basketball tournament niadtong Sabado diha sa City Sports Club-Cebu gym.
Si Kenneth Dysam mitali og 16 puntos alang sa Converters nga mi-ihaw sa Lexmark Stallions, 60-43, samtang si Ryan Veloso mikimada og 14 puntos uban ang pito ka rebounds ug tulo ka assists aron pag-aswat sa Teleperformance ngadto sa 85-81 nga kadaogan batok sa Accenture Sharks.
Si Sherwin Resilla miposte og 13 puntos ingon man 13 ka rebounds ug upat ka steals alang sa Converters. Si Franz Dione Dysam midugang og 12 puntos, lima ka rebounds ug tulo ka assists sa Converters, nga milusad og nagbagang opensa sa ikatulong kuwarter aron pagpapas sa ilang nuybe puntos nga alkansi sa halftime, 22-31, dayon na ngadto sa pagpayaka sa Stallions.
Sa maong mainit nga rally, ilang gilimitahan ang Lexmark ngadto lamang sa uno punto samtang sila miduslit og 25 puntos aron pag-usab sa hangin sa duwa pabor kanila.
Sa laing bahin, si James Lester Navaja mipakli og 13 puntos, lima ka rebounds ug tulo ka blocks alang sa Teleperformance. Si Dean Junber Escalon mitampo og 12 puntos alang sa All Stars, nga wala na molingi pa sukad mi-abante og tres puntos human sa unang kuwarter. (BANAT NEWS)
- Latest
