Milestone win sa Spurs’ trio

CEBU, Philippines – Nagsaulog sa ilang ika-541 nga kadaugan ang threesome sa San Antonio Spurs nga silang Tim Dunca, Tony Parker ug Manu Ginobili dihang midaog sila batok sa Boston Celtics, 95-87 sa National Basketball Association kagahapon didto sa Banknorth Garden sa Boston, Massachusetts.

Dili hinuon dagku’g puntos ang  Spurs star trio sa maong duwa, apan ang ilang milestone sa NBA maoy mas mahinungdanon ilabi na kay ang Celtics usa sa labing maayong team sa kasaysayan.

“They’re three wonderful players. They just care about winning games,”  matod pa ni Spurs coach Gregg Popovich.

Ang kadaugan sa Spurs  mas daghan pa sa nahimo sa ‘Big Three’ sa Celtics nga silang Larry Bird, Kevin McHale ug Robert Parish diin ilang gibuak ang tabla.

Si LaMarcus Aldridge mitali og 24 puntos uban ang 14 ka rebounds, lima ka assists aron pangulohan ang Spurs nga  aduna na’y 2-1 record.

Ang free-agent signee nga si Aldridge mihimo sab og 14 ka rebounds ug may lima ka assists alang sa Spurs kinsa aduna nay 2-1 record karon nga season.

Ang sentro nga si Duncan igo lang miiskor og siyete puntos uban sa siyam ka rebounds ug   lima ka assists, samtang sila si Ginobili ug Parker mihimo’g 13 ug sayis puntos, matag usa.

Ang  kadaugan maoy ikawalong sunod-sunod nga daog sa Spurs batok sa Celtics,  kinsa wala gyud mosurender bisan pa’g kanunay mabiyaan og labing menos 15 puntos.

Si Kawhi Leonard kinsa mihimo’g career-high 32 puntos sa ilang season opening  diin napilde sila  batok sa Oklahoma City Thunder, miposa lang og 19 puntos ug lima ka rebounds.

Didto sa Miami, si  Hassan Whiteside miposa og 25 puntos aron baswaton ang Heat ngadto sa ‘come-from-behind’ nga kadaugan batok sa Houston Rockets, 109-89.

Ang guard nga si Dwyane Wade mihakot og 20 puntos alang sa Heat, kinsa nabiyaan og 21 puntos sa sayong bahin sa third period.

Sa laing aksiyon, ang Oklahoma City Thunder milubong sa Denver Nuggets sa iskor nga 117-93 pinaagi sa 25 puntos gikan ni Kevin Durant didto sa Chesapeake Energy Arena

Midaog sab ang Dallas Mavericks batok sa Los Angeles Lakers, 103-93,  ang Toronto Raptors  miihaw sa Milwaukee Bucks, 106-87,   ang Chicago Bulls misungag sa Orlando Magic, 92-87 ug  ang Atlanta Hawks nakaipsot sa Charlotte Hornets, 94-92. (BANAT NEWS)