Quiñahan napiling PBA “Player of the Week”
CEBU, Philippines – Samtang wala pa uban kanila ang top gunner nilang si Paul Lee, ang Rain or Shine nakasigpat og laing alas nga maoy nagtuboy kanila sa mainit nga sinugdanan sa bag-ong PBA season.
Kini wa’y lain kun dili ang Sugbuanon nilang bigman nga si JR ‘Proktoy’ Quiñahan, kinsa misalida og maayo sa duha nila ka sunod-sunod nga daog batok sa Star Hotshots, 96-87 ug sa Mahindra Enforcers, 108-94, hinungdan nga siya ang gitunolan sa labing unang “Player of the Week” award sa ika-41 nga season sa liga.
Sa ilang duwa batok sa Star, ang produkto sa University of the Visayas Green Lancers mitali og 17 puntos, milangkat og walo ka rebounds uban ang upat ka blocks sud sa 27 ka minutos niining pagduwa.
Aron pagpakita nga dili bunga sa debuynas ang gihimo niyang pagratsada, ang garbo sa mga Mandauehanon miposa og 14 puntos sa impresibong 6-of-7 field goal shooting sa ilang kalampusan batok sa Mahindra.
Alang ni Beau Belga, ang pagka-agresibo ni Quiñahan krusyal kaayo sa Elasto Painters ilabi na kay nanginahanglan sila karon og tawo nga moduslit sa ilang opensa samtang dili pa makaduwa ang injured nga si Lee. (BANAT NEWS)
- Latest
