Sukmagay sa Carson
CARSON CITY, California – Lain na sab nga kasaysayan ang mohawok sa Philippine sports tungod kay si two-division world champion Donnie ‘Ahas’ Nietes ug ang gikaintapang managsuon nga sila si ‘Prince’ Albert ug Jason ‘El Niño’ Pagara mosalida na sa labing unang Pinoy Pride event sa Amerika
karong Sabado sa gabii (Domingo sa buntag oras sa Pilipinas) dinhi sa StubHub Center.
Ang maong pito ka away nga aksiyon nga gipasiugdahan sa ALA Promotions inabagan sa ABS-CBN Sports ug The Filipino Chanel garbo nang daan sa mga Pinoy isip labing unang boxing card sa Amerika nga gipasiugdahan sa usa ka Philippine-based promotional company nga dinhi sa Sugbo magbasi.
“It wasn’t easy for us to do this. The process was very painstaking,” matud pa ni ALA Promotions President ug CEO Michael P. Aldeguer. “But we made it happen. This is something big for Philippines boxing, something that we should all be proud of.”
Moaway sa labing unang higayon sa US, ang 33-anyos nga si Nietes misaad nga buhaton niya
ang tanan kutob sa iyang mahimo aron makapakita og impresyon sa pagdepensa niya sa iyang WBO light
flyweight belt batok ni Mexican challenger Juan ‘Pinky’ Alejo sa main event “Pinoy Pride 33: Philippines vs. the World.”
“Excited kaayo ko ug andam nang moaway. Ako gyud ihatag akong best aron malingaw ang mga
Pinoy fans diri ug ingon man sa tibuok kalibotan,” batbat pa ni Nietes. “Daghan nako naagian nga mga lisud nga away pero kini maoy pinakalisud para nako.”
Atol sa official weigh-in kagahapon sa Carson Civic Center, sila si Nietes ug Alejo yano ra kaayo
mikuha sa ensaktong timbang. Ang garbo sa Murcia, Negros Occidental mitimbang og 107.8 lbs., samtang si Alejo 107.4 lbs.
Sama ni Nietes, sila si Albert ug Jason Pagara nangandam sab sa ilang bunyag sa kayo didto sa US batok sa dekalibreng mga kontra gikan sa Nicaragua.
Ang wala pa’y pildeng si Albert Pagara (24-0, 17KOs) manalipod sa iyang IBF Intercontinental super bantamweight title batok ni knockout artist William ‘Chirizo’ Gonzales (27-5, 23KOs), samtang ang
iyang maguwang nga si Jason (36-2, 22KOs), ang WBO International super lightweight champion, makigtigi ni Santos ‘El Toro’ Benavides (25-7-2, 19KOs).
“Kabalo ko nga lig-on ning akong kontra, pero kining boksing man gud paunhanay. Sa makauna
lang namo ani unya,” matud pa ni Albert. Angayan sab nga atngan ang sumusulbong nga bitoon sa ALA
Stable nga si Mark ‘Magnifico’ Magsayo (11-0, 9KOs) nga modepensa sa iyang IBF Youth featherweight title batok sa Mehikanong si Yardley Suarez (13-0, 8KOs) sa sangka sa duha ka wa’y pilde ug batan-on nga mga bitoon.
Sa laing bahin, ang “Pinoy Pride 33” ipasalida sa Sky Cable pay per view Domingo sa buntag sa
kantidad nga P299. Ang ABS-CBN Sports + Action mopasalida sab sa mga away nga delayed sugod sa alas-
11 sa buntag ug adunay replay sa “Sunday’s Best” nga programa karong gabii. (BANAT NEWS)
- Latest
