CEBU, Philippines - Mahitabo na ang usa sa mga labing interesante ug lisud nga sangka sa Phl Azkals sa ilang pakigharong sa North Korea karong adlawa didto sa Kim Il-Sung stadium sa Pyongyang, North Korea.
Atubangan sa kapin 50,000 ka mga North Koreans, ang Azkals magsagubang og krusyal nga duwa tungod kay ang kadaugan mopadaku sa ilang tsansa nga moabante sa sunod round sa FIFA World Cup qualifiers.
Ang Azkals adunay 2-1 win-loss record,samtang ang North Korea pabiling wa’y pilde sa tulo nila ka duwa.
Ang North Korea maisip usab nga usa sa mga lig-ong contender sa Asya tungod kay kapila na sila miduwa sa World Cup diin katapusan niadtong tuig 2010.
Ang North Korea gitan-aw nga misteryoso ug delikadong nasud tungod usab sa higpit nilang mga patakaran isip usa ka diktadoryang nasud nga kasamtangan nga gipangulohan ni Kim Jung Un.
Adunay hungihong nga matud pa adunay bug-at nga silot ang nagpaabot sa ilang mga players kun mapilde kini sa duwa lakip na batok sa Azkals. (BANAT NEWS)