CEBU, Philippines – Nakahimo og buzzer-beating nga follow-up basket si Biern Anthony Laurente aron baswaton ang University of the Visayas Baby Lancers ngadto sa kulbahinam nga kadaogan batok sa University of San Carlos Baby Warriors, 57-55 aron maangkon ang ikatulong pwesto atol sa ilang knockout match sa 15th season sa Cebu Schools Athletic Foundation, Inc. (CESAFI) juniors division didto sa Cebu Coliseum.
Ang Baby Lancers kinsa maoy naglabaw atol sa halftime, 32-23, nabiyaan sab og nuybe puntos may 7:32 ang oras sa fourth period human sa basket ni Ken Gato, 49-40 apan hinay-hinay silang mikamang sa unahan aron makasikit hangtod nga natabla kini ni Raul "Jancork"Cabahug sa 52-all may 3:39 ang oras sa duwa.
Nasakmit pagbalik sa Baby Lancers ang labaw, 55-54 pinaagi sa split charities ni Cabahug may 1:24 ang oras apan natabla sab kini ni RJ Mendez pinaagi sab sa iyang kaugalingon nga split charities sa nagka-upos na nga oras diin may 1:02 na lang ang nahibilin sa maong duwa ug nanimaho unta ang overtime dihang wala'y naka-iskor sa duha ka habig hangtod nga maoy nakakuha sa kataposang ball possession ang Baby Lancers.
Misipyat si Jim Paul Amistoso sa iyang three-point attempt apan didto mahagbong ang bola sa tungod ni Laurente kinsa mihimo'g follow-up ug misulod ang bola sa ring igo gyud mihuni ang final buzzer.
Samtang mikaging ang mga players sa Baby Warriors, nagsabot ang tulo ka referees alang sa ilang hukom ug misensyas si referee Benjie Calma nga "counted" ang maong basket kay didto na kini sa ring atol sa final buzzer.
Si Cabahug maoy nangu sa Baby Lancers sa iyang 25 puntos uban sa 11 ka rebounds, usa ka assists ug usa sab ka steal samtang walay nakahimo'g double figures alang sa Baby Warriors kinsa gipangulohan ni Ken Gato sa iyang nuybe puntos. (BANAT NEWS)