Pilipinas mopakita na og Gilas
CEBU, Philippines – Nahuman na ang pagpangandam ug panahon na aron ipakita sa Gilas Pilipinas ang ilang katakus alang sa giambisyon nilang luna sa 2016 Olympics sa pagsugod sa ilang kampanya sa FIBA Asia Championship karong adlawa didto sa Changsha, China.
Human sa pipila ka buwan nilang training camp, ang Gilas mosugod na og taak sa lisud nga dalan paingon sa gold medal sa FIBA Asia.
Unang sangkaon karon sa Gilas ni coach Tab Baldwin mao ang Palestine karong alas-11:45 sa buntag ubos sa Group B.
Dili kaayo kusgan ang mga koponan nga naglinya nga sangkaon sa Gilas sa group stage, apan si Baldwin miingon nga kinahanglan nga seguraduhon sa national team ang kadaugan aron makuha ang unang luna sa Group B standing.
Human sa Palestine, ang Gilas moharong sunod sa Kuwait ugma ug dayon ang Hong Kong sa Biyernes.
Sugod niadtong tuig 2009, ang Gilas nindot og gipakita sa preliminary rounds ug ning higayona nakita nga susama gihapon ang buhaton sa koponan sa dili pa nila atubangon ang mga lig-ong koponan sa knockout stage.
Ang Gilas lauman nga mopakita gihapon sa ilang abilidad batok sa Palestine karon ilabi na nga rank No.12 ang nauwahi sa FIBA Asia ranking.
Mobida sa Palestine mao sila si Imad Qahwash, Salim Sakakini, Shadi Khatib ug Hamza Yousef.
Atngan karon ang Gilas kun hatagan ba nila og taas nga playing time ang ilang naturalized center nga si Andray Blatche, kinsa gituohan nga papahuwayon una aron maandam sa hugot nga duwa batok sa mga powerhouse teams sama sa China, Iran ug South Korea. (BANAT NEWS)
- Latest
