Sagdi lang og wala'y PBA kay naa man sa'y CESAFI

Maanindot gyud untang hunahunaon kung nadayon pa ang laraw pagduwa dinhi sa dakyban sa Sugbo sa duha ka mga paboritong teams nga San Miguel Beermen ug Ginebra San Miguel.

Tagsa lang kita makakita sa linawas sa duwa sa PBA dinhi  mismo sa atong nataran busa, anugon gyud kaayo nga nakanselar ang ilang duwa isip unta tune-up game alang sa umaabot nga PBA season karong Oktubre apan nakadawat ang SPORTSgab og text message gikan sa atong higalang promoter nga si Lorenzo "Chao" Sy nga dili madayon ang pagbisita dinhi sa Sugbo sa San Miguel ug Ginebra.

Niadtong Septiyembre 3, mipahibalo kanako si Sy nga iyang dad-on dinhi ang Beermen pinangulohan sa back-to-back MVP nga si June Mar Fajardo ug ang Gin Kings pinangulohan ni Gregg Slaughter ubos sa bag-ong coach ang multi-titled coach nga si Tim Cone.

Nagpadala og invitation letter si Sy ngadto sa duha ka PBA teams nga naghangyo nga tugotan nila ang team sa pagduwa og duha ka adlaw dinhi sa Sugbo---ang una, magsangka ang Beermen og usa ka local team ug ang Gin Kings makigsangka sab sa usa ka local team ug sa ikaduhang adlaw, magsangka na ang Beermen ug ang Gin Kings.

Paglabay sa kapin usa ka semana, mi-text na sab si Sy kanako nga nagpahibalo nga dili madayon ang tune-up game ug ila kining gikanselar.

Matod pa ni Sy nga nasubo siya nga nakabalo sa tubag ni San Miguel ug Ginebra team manager Robert Non nga dili sila modayon tungod kay apike na kaayo alang sa Oktubre 18 nga PBA opening.

Sa miaging gabii, migawas gyud ang tinuod nga dili gyud diay ganahan moduwa ang San Miguel ug ang Ginebra diha sa Cebu Coliseum kay maoy ilang gusto ang hoopsdome didto sa dakabayan sa Lapu-Lapu kay kuno bisa'g gamay apan limpyo.

Tinuod, nindot gyud unta tan-awon ang PBA ilabi na kay makakita kanilang Fajardo ug Slaughter.

Apan wala kitay mahimo kung mao kanay pagbuot sa duha ka PBA teams.

Ang maayo natong buhaton, maoy atong tan-awon ang duwa sa CESAFI kay mao kini gipaabot sa mga fans ilabi na kay mibalik na sab sa finals ang Sacred Heart School-Ateneo de Cebu Magis Eagles ug ang University of Cebu.

Hapit na sab nato hisayri kung kinsa gyud ang magbagat sa finals sa collegiate division. Segurado na hinoon sa top 3 sa semifinals ang University of San Carlos Warriors, University of the Visayas Green Lancers ug ang Southwestern University Cobras.

Napilde ang Cobras sa University of Cebu Webmasters niadtong Sabado sa gabii, 75-82 nga gigudahan nga usa ka "bigay" kay kahibulongan kuno kaayo nga bisan og nabiyaan na og 20 puntos ang Cobras, wala gyud masuko si coach Raul "Yayoy" Alcoseba.

Gituyo kuno sa Cobras nga ang Webmasters maoy pasudlon sa round robin semifinals kay mas sayon kini pildehon kung itandi sa University of San Jose Recoletos Jaguars.

Hibaw-an kini sa dili madugay ug mahibaw-an sab kung husto ba ang maong stratehiya.

MISCELLANEOUS. Congratulations to the University of Cebu Junior Webmasters for making it to the finals in the juniors division against the Sacred Heart School- Ateneo de Cebu Magis Eagles next week. One of you could become champion. May the best team wins. Good Luck to both of you.