CEBU, Philippines – Ang Supportsave Dragons mipakgang sa Calltek Trojans, 88-68, aron pag-angkon sa solo nga liderato sa Evo League bitbit ang 8-1 win-loss record, samtang ang 24/7 Cagers mipakurat sa Kyocera Frontiers, 70-65, sa 11th CSCC E-League men's basketball tournament niadtong Sabado didto sa City Sports Club-Cebu gym.
Si Niño Belande mipatuasik og 30 puntos uban ang 13 ka rebounds, unom ka steals ug upat ka assists alang sa Dragons, nga maoy mikontrolar sa duwa human miposte og 10 puntos nga labaw, 20-10, sa unang kuwarter. Wala na sila milingi pa sukad niadto dayon na ngadto sa paglubong sa Calltek of 20 puntos.
Si Aerl Genebraldo miposa og 23 puntos uban ang 10 ka rebounds, samtang si Patrick Jamlan mikimada og 20 puntos apan wala sila kaugpo gumikan kay ang Trojans nadakin-as man ngadto sa 4-5 win-loss record.
Sa habig sa Cagers, nagsandig kini sa eksplosibong performance ni Ralph Belarmino aron pagsurprisa sa Frontiers. Si Belarmino mipabuto og 44 puntos ug milangkat og 14 ka rebounds alang sa Cagers, nga mitali sa ikatulo pa lamang nilang daog sa walo ka duwa, samtang ang Frontiers nakatilaw sa ikaduha pa lamang niining pilde nga gi-atbangan og unom ka daog.
Sa laing duwa sa Evo League, si Jan Isiah Gabest ug Mark Lester Cortes miratsada og 19 puntos matag usa aron pag-agak sa 1&1 Marauders ngadto sa 76-70 nga kadaogan batok sa Contact Solutions, samtang si Clifford Amarado ug Daryll Teves Ouano nagkumboya og 37 puntos aron pagtuboy sa Wipro Tigers ngadto sa 80-72 nga kalampusan batok sa SSI Warriors. (BANAT NEWS)