CEBU, Philippines - Nahurot og kaparot ang mga Pinoy’ng bilyarista sa 2015 World 9-Ball Championship didto sa Al Arabi Sports Club sa Doha, Qatar.
Sa tanang Pinoy nga entrante, si Dennis ‘Robocop’ Orcollo ang dunay labing taas nga nakab-ot sa maong torneyo nga migahin og kinatibuk-ang ganti nga $200,000 sa mga top performers.
Ang tirador gikan sa Surigao nakalayat sa quarterfinal round human iyang gipukan si Darren Appleton sa Great Britian, 11-2, apan nahisugamak sab dayon siya sa mga kamot sa Amerikanong si Shane Van Boening, 1-11 sa Final 8.
Ang garbo sa mga Sugbuanon nga si Warren Kiamco midaog sa Final 32 batok ni Jalal Yousef sa Venezuela, 11-7, apan gitagak sab dayon siya ni Ko Pin Yi sa Chinese Taipei, 9-11, sa round of 16 knockout stage.
Wala sab makaugpo silang Jeffrey Ignacio, Carlo Biado ug Oliver Medenilla nga kutob lamang sa Final 32. Si Ignacio gipalagpot ni Aloisius Yapp sa Singapore, 6-11, si Biado napilde ngadto ni Ko Pin Yi sa Taipei, 4-11, samtang si Medenilla gitagak ni Chang Yu Lung gikan gihapon sa Taipei, 4-11.
Katapusang nanghawod ang usa sa Pinoy sa labing prestihiyosong torneyo sa billiards sa tibuok kalibotan niadto pang tuig 2010 human gipilde ni Francisco ‘Django’ Bustamante si Kuo Po-cheng sa Chinese Taipei aron pagbira sa tropeyo.
Sila si Ronnie ‘The Volcano’ Alcano ug ang Sugbuanon nga si Antonio ‘Gaga’ Gabica miabante sa finals niadtong tuig 2011 ug 2013, apan gipakaging sila ni Yukio Akagariyama sa Japan ug Thorsten Hohmann sa Germany.