Mga tang-an magtigI sa CEPCA Silver chessfest
CEBU, Philippines - Ang labing tang-an ug tadhan nga mga Sugbuanong magduduwa og ahedres magtakus sa ilang abilidad sa Cebu Executives and Professionals Chess Association (CEPCA) Silver Anniversary Open Tournament karong weekend diha sa bakanteng lugar duol sa Slimmers World sa ikaduhang andana sa SM City-Cebu.
Ang mga kadagkuan sa CEPCA nga gipangulohan sa ilang presidente nga si Engr. Jerry Maratas mipinalisar sa tanang detalye kabahin sa labing daku nilang event atol sa katapusan nilang organizational meeting sa miaging gabii didto sa Handuraw Pizza.
Mitambong sab sila si CEPCA founder Boy Pestaño, Ruel Hortelano (auditor), Jun Olis (secretary), Harvey Jane Hilvano (recording secretary), Rolando Moralla (board member), Jun Kidlat (treasurer) ug chief arbiter Marvin Ruelan.
Matud pa ni Olis nga dili momenus sa 150 ka players ang mosalmot sa duha ka adlaw nilang torneyo nga mogahin og sobra sa P50,000 nga ganting salapi ngadto sa mga mananaog.
Ang top contenders nga angayang lantawon mao sila si NM Merben Roque ug Elmer Sungat, ug si FIDE Master Anthony Makinano. Lain pang mga paborito mao sila si Arnold Cadiz, Rogelio Enriquez, Edsel Montoya, Rommel Ganzon, Richard Natividad, Voltaire Sevillano ug Allan Salientes.
Moapil sab silang Alan Pason, Carlos Moreno III, Bryle Arellano, ang managsuong Balbona, Joel Pacuribot ug pipila ka mga collegiate varsity players sa nagkadaiyang unibersidad dinhi sa Sugbo.
Ang registration nagkantidad og P150 sa ladies ug kiddies (14 anyos paubos), P200 sa Cepcans ug seniors ug P300 sa mga regular players.
Ang mga organizers modawat og on-site registration sa alas-10:30 sa buntag karong Septiyembre 19. Ang unang hugna banatan dayon human sa pormal nga seremonyas sa pagbukas sa ala-1 sa hapon. (BANAT PALARO)
- Latest
