CEBU, Philippines – Turno na sab sa second seeded University of San Carlos Baby Warriors ug third seed University of Cebu Junior Webmasters aron magsangka sa semifinals sa 15th Cebu Schools Athletic Foundation, Inc. (CESAFI) basketball tournament karong alas-5:15 sa hapon diha sa Cebu Coliseum.
Mas pabor ang Baby Warriors batok sa Junior Webmasters sa ilang sangka tungod sa ilang gidak-on ilabi na nilang Bridyn Aleyth Smith, Gerard Macandong ug Lyder Canieso. Adunay mga tag-as ang Junior Webmasters, apan mga sapsing og lawas sama nilang Jason Florence Abejo, Luigi Konrad Gabisan ug Hiljun Hemida. Hinuon, ila kining mabawi tungod sa ilang kapaspas ug sa lig-on nga depensa.
Sa collegiate division, ang topseed nga USC Warriors nga magpadayon ang ilang winning-streak dihang ilang banggaon ang University of San Jose- Recoletos Jaguars.
Human makatilaw sa ilang unang pilde batok sa Southwestern University Cobras pagsugod sa second round sa eliminasyon, ang Warriors nagmangtas ug mikulit og duha ka sunod-sunod nga daog, ang labing ulahi sa iskor nga 83-70 batok sa Cebu Institute of Technology-University Wildcats aron pabiling magsolo sa unang dapit sa ilang 8-1 nga baraha.
Tuyo sa Warriors nga mokulit sa ikatulong dapit sa ilang duwa batok sa Jaguars sa alas-6:45 sa gabii. (BANAT NEWS)