Abad, Chicano nidominar sa National Duathlon

CEBU, Philippines – Ang dugay na kaayong miyembro sa national team  nga si Mirasol Abad ug John Leerams Chicano maoy nanghawod sa tagsa-tagsa nila ka dibisyon sa premiere elite class sa  2015 Cebu National Duathlon Championships sa miaging adlaw didto sa South Road Properties.

Si Abad nag-una sa  standard class human niya gitapos ang lumba sud sa duha ka oras, 24 minutos ug 35 segundos. Nagsunod niya ang Cebuana runner nga si Miscelle Gilbuena  sa oras nga 2:24:35. Si Elona Louise Villacin mitapos sa ikatulo sa oras nga 2:43:43.

Sa iyang bahin, si Chicano mao sab  ang midaog sa standard distance sa men’s elite sa oras nga 1:56:30.  Sila si Robeno Javier  (1:57:25) ug si Joey Delos Reyes (1:59:45) maoy miokupar sa ikaduha ug ikatulo nga dapit.

Sa age groups, si Loren Codera misakiyo sa men’s 30-34 class sa oras nga 2:28:57, Julius Delos Reyes sa 25-29 class sa 2:18:46, si Joland Olmilla naghari sa 20-24 sa oras nga 2:06:47. Si Carlos Macasarte sa 50-above class sa oras nga 3:00:47, si Michael Cortes midaog sa 45-49 class sa iyang 2:35:14 ug si Ian Solana nag-una sa 35-39 division sa oras nga 2:14:36. (BANAT NEWS)