Mga tadhang kontra

CEBU, Philippines – Ang managsuong ‘Prince’ Albert ug Jason ‘El Niño’ Pagara ug ang sumusulbong nga bitoon nga si Mark ‘Magnifico’ Magsayo literal nga mabunyagan gyud og kayo gumikan kay gikatakda man silang makigharong batok sa tadhan nga mga kontra sa labing unang Pinoy Pride event sa ALA Promotions International ug ABS-CBN Sports sa Amerika karong Oktubre 17 didto sa StubHub Center sa Carson City, California.

Si Albert Pagara (24-0, 17KOs), ang wala pa’y pildeng IBF Intercontinental super bantamweight champion, moharong ni Nicaraguan knockout artist William ‘Chirizo’ Gonzalez (25-5, 23KOs), si Jason Pagara (36-3, 22KOs) makigsinukliay og kumo batok sa kababayan ni Gonzalez nga si Santos ‘El Toro’ Benavides (25-7-2, 19KOs), samtang si Magsayo (11-0, 9KOs) makigbatok sa Mehikanong si Yardley Suarez (13-0, 8KOs) sa kulbahinam nga engkuwentro sa mga wa’y pildeng featherweight prospects.

Mao kini ang labing lisud nga hagit nga atubangon ni ‘Prince’ Albert sa iyang karera gumikan kay iya man nga sangkaon si Gonzalez, nga kahadlokan kaayo ang kinumo gumikan kay 23 sa 25 niini ka mga biktima iya gipatikangkang.

Sa miagi niyang away, gipakamang ni Gonzalez si Cornelius Lock sa ikapitong hugna aron pagsakmit sa WBA-NABA featherweight belt niadtong Mayo 9 didto sa Dover Downs Hotel and Casino sa Dover, Delaware, USA.

“For Albert,  this should be his biggest test against a fighter that fought world champs and is a certified puncher with 23 KOs in 25 wins,” matud pa ni ALA Promotions President ug CEO Michael P. Aldeguer.

Ang maguwang ni Albert nga si Jason, ang WBO International light welterweight champion, masukod sab ang tinuoray nga abilidad batok sa 33-anyos nga si Benavides, usa ka beteranong welterweight sud na sa 34 ka mga away.

“Benavides should give Jason an idea what’s it like fighting abroad and at this competitive weight as he has fought upcoming undefeated prospects. Jason has to show what he can do,” dason pa ni Aldeguer.

Sama sab nga hagit ang nagpaabot ni Magsayo sa labing una niyang away sa Amerika nga mahimo niyang babag o di ba kaha taytayan sa mas daku nga oportunidad sa unahan.

“This is his biggest test against an undefeated Mexican prospect. This should be a big test for Magsayo to prove that he is indeed the real deal. Suarez is an upcoming prospect from Mexico too so this fight should tell who is for real,” dugang pa ni Aldeguer.

Ang managsuong Pagara ug si Magsayo kasamtangan karong nagbansay-bansay ubos sa paggiya ni trainer Edito ‘ALA’ Villamor didto sa Wild Card Gym ni Freddie Roach didto sa Los Angeles.

Mouban unya kanila si two-division world champion Donnie ‘Ahas’ Nietes (36-1-4, 21KOs), nga modepensa sa iyang WBO ug The Ring light flyweight title batok sa Mehikanong si Juan ‘Pinky’ Alejo (21-3, 13KOs) sa main event sa maong makasaysayanong “Pinoy Pride 33: Philippines vs. The World”. (BANAT NEWS)