CEBU, Philippines - Gatosan ka mga batan-ong atleta ang magdangop dihang mosikad na ang 5th Mayor Teresa P. Alegado Cup Fiesta Basketball League karong hapon didto sa Poblacion Occidental barangay gym sa Consolacion.
Sa dili pa ang mga duwa, usa ka pormal nga seremonyas sa pagbukas ang ipahigayon sugod sa alas-2 sa hapon diin kini pagatambungan ni Mayor Nene Alegado, Vice Mayor Rey Damole ug sa tanang sakop sa Sangguniang Bayan.
Gawas sa pagpili sa best muse ug best in team uniform, lain pang angay nga lantawon sa kalihukan karong adlawa mao ang cheerdance competition.
Ang tanang 21 ka barangay sa maong lungsod mosalmot sa torneyo nga modagan og usa ka bulan.
Mga kategoriya nga kumbatihan mao ang inter-barangay seniors A ug B, ug ang SK (Sangguniang Kabataan) juniors A ug B.
Mga entrante sa inter-barangay seniors A ug SK juniors A mao ang Poblacion Oriental, Poblacion Occidental, Pulpogan, Danlag, Cabangahan, Nangka, Tugbungan, Jugan, Tayud, Pitogo, Lamac, Cansaga ug Casili.
Samtang ang mga entrante sa inter-barangay seniors B ug SK juniors B mao ang Tolotolo, Garing, Polog, Panas, Panoypoy, Lanipga, Sacsac ug Tilhaong.
Ang komitiba sa maong sports events gipangulohan nilang konsehal Nilo Ferraren ug Boy Tibon ug ABC President Marilou Casul. Ang mga duwa ubos sa superbisyon ni league commissioner Paul Alelu Q. Flores, kanhi star player sa Far Eastern University (FEU) Tamaraws sa dihang nagduwa pa siya sa UAAP. Moabag kaniya mao si technical committee head Aurelio Eslawan. (BANAT NEWS)