Community service

Sukad giimplementar sa Cebu Schools Athletic Foundation, Inc. (CESAFI) ang bag-o niining lagda kabahin sa ‘community service’ karong season, upat na ka badlungon nga mga basketball players ang napiksan sa  maong silot kansang tumong kamaayohan.

Kini mao sila si Janwein Widsom Ceniza sa University of Southern Philippines Foundation, Ferdinand Risma ug Kent Mayol sa University of San Jose-Recoletos ug Mumar sa Cebu Institute of Technology-University.

Gawas sa usa ka duwa nga suspensiyon ug P5,000 nga multa, ang upat gimandoan sab nga mopahigayon og upat ka  oras nga pagserbisyo sa komunidad gamit ang ilang talento ubos sa superbisyon sa Cebu City Sports Commission.

Mao kini ang dugang nilang silot human ma-thrown out sa miagi nilang mga duwa. Si Ceniza gumikan sa duha ka sunod-sunod nga unsportsmanlike fouls, sila si Risma ug Mayol sa pag-asdang nila sud sa korte sa dihang dunay kaguliyang nga nahitabo bisan og wala sila’y labot, ug si Mumar gumikan sa pagsukmag niini ni Lyndon Colina sa USPF.

Apan sukwahi sa upat ba buloyagong mga players, ang tibuok puwersa sa University of the Visayas Green Lancers ubos sa pagtimon ni coach Gary Cortes ug assistant niining si Val Halen Parmis mihimo og ‘community service’ dili pa lang dugay.

Dili isip pagsangon sa usa ka silot kay wala man sila nagpabadlong sa liga kun dili isip kabahin sa ilang kawsa nga nahisubay sab sa gitanom nga mission ug vision sa labing unang unibersidad sa Kabisay-an.

Dason pang Parmis nga gawas sa pagdaog og mga duwa sud sa korte, tipik sab sa ilang tinguha mao nga sila makatandog sa kinabuhi sa uban ilabi na sa mga sektor sa katilingban nga nanginahanglan og pagtagad, pagsabot ug pag-amuma.

Sa miaging semana man gud, ang Lancers mibisita sa House of Hope, usa ka drug rehabilitation center didto sa dakbayan sa Lapu-Lapu. Matud pa ni coach Parmis nga sila si  coach Cortes nakigduwa og basketbol sa mga pasyente sa maong pasilidad nga nangandoy nga mabag-o ang kinabuhi human magumon sa ginadiling droga.

Nagkanayon si coach Parmis nga ang maong kasinatian seguradong makapahigmata sa ilang mga players kun unsay kadaut nga mahimo sa droga sa ilang kinabuhi kun ugaling sila magpaulipon sa maong bisyu. Alang ni Parmis, usa sab kadto ka higayon nga makadayeg og maayo ang ilang players sa kaanindot sa isports ug ingon man panahon nga magpasalamat og taman sa Ginoo gumikan kay nahalikay sila sa maong dautan nga elemento nga seguradong makaguba sa ilang ugma.

Gawas nga nagtimbaya sa mga drug dependents sa maong rehab center, ang Lancers naghatag sab sila og mga bola aron dasigon silang tanan nga mogakus sa paugnat sa kusog kay usa kini ka epektibong pamaagi aron mahilayo ang mga kabatan-onan sa bisyu. Ila sab nga gidapit ang mga drug dependents nga mosaksi sa usa sa ilang mga duwa sa umaabot sa nagpadayong CESAFI sa tinguha nga madagkutan og balik ang ilang pagkahilig ug interes sa sports nga seguradong makatabang kanila sa ilang pangindahay nga magabaton og mas limpyo ug mas lagsik nga panglawas.

Dalaygon kaayo ang maong kawsa sa UV Lancers nga angay  nga panaminan ug sundon sa uban kay seguradong magbunga man kini og kamaayohan sa uban.