Dorma, MegaBond, CMI daog dayon sa A+EBA Corporate Cup
CEBU, Philippines – Gisubhan og daog sa Dorma, MegaBond ug CMI (Cabinet Members , Inc.) ang ilang kampanya sa Architects+Engineers Basketball Association’s 1st Corporate Cup niadtong Sabado didto sa University of San Carlos-Main gym.
Si Ed Macasling miratsada og 24 puntos alang sa Dorma nga milatos sa Davies Paints, 71-61, si Nick Abapo mitali og 21 puntos aron pagtuboy sa MegaBond ngadto sa 71-64 nga kadaugan batok sa Fenestram, samtang si Samboi Parcon mikimada’g 21 puntos sa CMI nga mipakgang sa Phoenix, 61-53.
Sila si Nathaniel Benedicto ug Julius Kerwin Orit mikulit og 15 puntos matag usa alang sa Dorma, nga milusad og 19-8 run sa ikatulong kuwarter aron pagpukan sa Davies Paints.
Sa habig sa MegaBond, alkansi sila og siyete puntos sa halftime, 28-35, apan milusad sila og nagkayong opensa sa final half nga ilang gitak-op pinaagi sa 25-14 rally nga maoy nakapakugang sa Fenestram.
Si Malvin Malicdem mitampo og 16 puntos alang sa MegaBond, samtang si Gerald Jayme miamot og 15 puntos uban ang pito ka assists.
Sa iyang bahin, si Jun Villacorta miabag ni Parcon pinaagi sa pagtali og 16 puntos alang sa CMI nga midominar sa Phoenix human milabaw og otso puntos sa halftime, 26-18. (BANAT NEWS)
- Latest
