Petron Goldberry, RDAK Stallions midaog na SAB

CEBU, Philippines - Mihipos og laing daog   ang Petron Goldberry ug ang RDAK Stallions sa Division A sa  20th SHAABAA Cup  niadtong Miyerkules didto sa SHS old campus sa  Gen. Maxilom Avenue.

Ang Petron Goldberry  mipilde sa Bayfront Hotel Cebu, 55-47 alang sa ilang 8-0 nga baraha, samtangang RDAK Stallions mipilde sab sa    Cebu Landmasters, 52-46 aron moabante sa ikaduhang dapit sa ilang 5-2 record.

Sila si Leigh Dixon ug Ed Macasling  parehong mibahog og 14 puntos, samtang  si Job Shen adunay 10 puntos aron pangulohan ang Goldberry.

Bugtong si Elddie Cabahug lang ang mikulit og double figures alang sa Bayfront sa iyang 22 puntos.

 Sa laing bahin,  si Jair Igna mipabuto’g 16 puntos   aron maoy mangu sa RDAK Stallions, samtang si Daryl Tan mao sab ang nangu sa Cebu Landmasters sa iyang 17 puntos.

Sa laing sangka sa Division A, ang Gaisano Capital midaog batok sa Chick@Phil Basic, 73-62.

Upat ka players sa Gaisano Capital ang mihimo’g double digits  pinangulohan nilang Carlitos Romero ug Jasper Diaz  nga adunay 12 puntos matag usa. Ang Chick@Phil Basic gipangulohan ni Brennon Gothong sa iyang 16 puntos, sila si Jappeth Quinanola ug Edison Hao parehong miamot og 10 puntos.

 Sa  Division B,   ang Caltex Delo  mipilde sa Autolab, 48-37,  ang Dynamic Power midaog  batok sa White Gold Club, 49-31 ug midaog  sab ang RDAK Transporters batok sa  Filmon Finishing Studio, 54-44.

  Ang RDAK Transporters nga maoy lider sa Division sa ilang 8-1 nga baraha  gipangulohan ni Barlowe Rogado sa iyang14 puntos , samtang gipangulohan sab ni Aldie Canizares ang 1-7 nga Filmon  sa iyang 17 puntos.

Sa laing bahin, si Rodrick Mangubat  maoy nangu sa Dynamic Power sa iyang 21 puntos, samtang si Romeo Alejandro   sa White Gold Club  adunay 18 puntos.  (BANAT PALARO)