Mga plano ni Pacman

Sa miaging tulo ka mga adlaw, nakahigayon na sab ta nga makauban ang giidolo natong si Manny Pacquiao. Mibisita man gud siya dinhi sa Sugbo ug kabahin sa iyang tuyo mao ang pagtambong sa shooting competition nga gipahinungod kaniya, ang 1st Congressman Manny Pacquiao Challenge niadtong Sabado didto sa CPRA Firing Range sa Brgy. Pusok, dakbayan sa Lapu-Lapu.

Sa iyang pag-abot niadtong Huwebes sa gabii, usa ko sa mga misugat ni Pacquiao uban ang usa sa labing suod niyang higala ug sinaligan nga si Rex ‘Wakee’ Salud. Taas-taas sab ang among nahisgutan nga naglakip sa pipila ka mga maanindot nga estorya sa Bibliya sama sa tiunay nga pagtuo ni Samson ngadto sa Ginoo kinutlo gikan sa Book of Judges.

Kay gipabalik man ko niya sa iyang hotel suite sa Movenpick Mactan Resort niadtong Biyernes sa gabii, nakahigayon ko pakig-estorya kaniya sa mas taas-taas pa nga higayon diin akong naugkat ang pipila sa iyang mga plano sa umaabot.

Una, gikompirmar ni Pacquiao nga mobalik siya og boksing sa tuig 2016. Wala siya mohatag og tukmang petsa ug wala sab siya mipadayag kun kinsa ang gusto niyang makontra. Iya hinuon gitataw nga pulos nindot  nga away bisan kinsa nila ang iyang maengkuwentro, si British welterweight star Amir Khan ba o si WBA super lightweight champion Danny Garcia.

Ikaduha, mipatapsing kanato si Pacquiao kabahin sa iyang politikanhong lakang. Sa dihang akong gipangutana kun modagan ba siya pagka-Senador, pahiyom maoy iyang gitubag dungan sa pag-ingon nga usa kini ka seryosong butang nga iyang gitimbang-timbang sa pagka karon. Sa akong basa, daku’g impluwensiya unya sa iyang karera sa politika kun unsay desisyon sa iyang suod ug gitamod nga higala, si Davao City Mayor Rodrigo ‘Digong’ Duterte.

Gawas sa politika, karera sa boksing ug Bibliya,  kabahin sa among gihisgutan mao ang lain pang gikahiligan ni Pacquiao nga mao ang duwang basketbol. Gipahibawo mismo kanako ni Pacquiao nga iyang dad-on ang iyang Mahindra Enforces team (kanhi Kia Carnival), sa Dubai karong  Nobiyembre 6 aron moduwa og usa ka bearing PBA game batok sa San Miguel Beermen o dili ba kaha Alaska Aces.

Daghan pa’g gisaysay  ang eight-division world champion dinhi kanato ug sa kinatibuk-an akong nalantawan sa unahan nga kun ugaling mosawop na ang adlaw sa karera sa boksing, usa ka Pacquiao nga tigsabwag sa Ebanghelyo ug ingon man mohatag og tumang pagtagad sa serbisyo publiko labi na ngadto sa mga kabus ug nanginahanglan ang atong masigpatan.