SHS-ADC, USC magtigi

CEBU, Philippines – Sa labing unang higayon karon nga season, pulos high school teams ang magduwa diin magtakos ang wa'y pildeng Sacred Heart-School Magis Eagles ug ang University of San Carlos Baby Warriors sa nagpadayon nga 15th season sa Cebu Schools Athletic Foundation, Inc. (CESAFI) didto sa Cebu Coliseum

Dili na makahimo'g sweep ang Baby Warriors human sila mapilde kagahapon sa Cebu Institute of Technology-University Wildkittens, 50-55 apan may purohan gihapon silang mahimong no. 1 sa higayon nga ilang pildehon ang Magis Eagles pinaagi sa simple tie sa higayon nga magtabla sila sa 7-1 nga baraha human sa first round of eliminations.

Dakung bihag ang natangag sa Wildkittens kaniadtong Sabado ug hayan mas madugangan pa gyud ang  ilang daog karon tungod kay mas huyang ang ilang kontra nga Don Bosco Technology Center Junior Greywolves.

Sa primerong sangka sayo karong hapon, mas pabor sab ang University of the Visayas Baby Lancers kung itandi sa nagsangki-ig nga Cebu Eastern Dragons kinsa bag-o lang nakasinati og masakit nga kapildehan sa University of Cebu Junior Webmasters, 65-66 kaniadtong Sabado.

Sa laing bahin, hapsay pa gihapon ang record sa Magis Eagles dihang ilang gipukan ang Junior Webmasters sa iskor, 76-62 diin maoy nahimong best player of the ballgame si Travis Jelour Mantua kinsa mibahug og 18 puntos, lima ka assists ug duha ka steams apan si Eroll Pastor maoy top scorer sa iyang 19 puntos uban sa duha ka rebounds ug mihimo sab siya'g 9 of 11 sa two-point field goals.

Parehong miamot og otso puntos matag usa silang Andrew Velasco ug Christian Manaytay alang sa 6-0 nga Magis.

Ang 5-3 nga Junior Webmasters gipangulohan ni Froilan Mangubat kinsa miposa og 22 puntos lakip ang 11 ka rebounds, lima ka steals ug duha ka assists.Midugang og 11 puntos si John Bryl Cuyos ug may otso puntos si Luigi Konrad Gabisan.

Sa unang sangka sa juniors division kagahapon, midaog na sab ang University of San Jose Recoletos Baby Jaguars batok sa Junior Greywolves, 71-42.

Si John Kirk Gonzaga maoy nangu sa 4-2 nga Baby Jaguars sa iyang 20 puntos ug may 14 puntos si Arnold Dave Ando nga maoy labing taas niya nga puntos karon sa torneyo.

Bugtong si Juan Miguel dela Torre lang ang mi-iskor og double figures alang sa 0-7  Juniors Greywolves sa iyang 12 puntos. (BANAT NEWS)