CEBU, Philippines – Nagmalampuson ang opening sa Cebu People’s Coop Sportsfest 2015 niadtong Domingo didto sa Barangay San Nicholas Sports Complex atubangan sa San Nicolas de Tolentino Parish, ning siyudad.
Dul-an sa 200 ka mga empleyado gikan sa 24 ka sangang buhatan sa Cebu People’s Coop ang mitambong sa opening ceremony diin mga pinasidunggang dinapit ug mamumulong mao sila si Brgy. San Nicolas councilor Jojo Peralta ug Barangay Councilors League of the Philippines President Raymond Garcia.
Si Sportsfest Committee member Eric Abistado miingon nga ang mga duwa ipahigayon sa adlaw’ng Sabado ug Domingo. Ang torneyo gikatakda nga mahuman karong bulan sa Disyembre.
Adunay walo ka koponan ang mag-ilog sa korona sa basketball, samtang unom sa volleyball.
Ang mokampiyon nga mga koponan makadawat og P5,000, samtang P3,000 ug 2,000 sa second ug third placers. (BANAT NEWS)