CEBU, Philippines – Ang mga Sugbuanong archers nakaigo og maayong marka sa Silliman University Founder’s Day Indoor Archery Tournament sa miaging adlaw didto sa dakbayan sa Dumaguete.
Si Rosendo ‘Dondon’ Sombrio nga dugay na kaayong sakop sa national team ug ang bag-ong sulbong nga talento nga si Vincent Villa maoy nangu sa kampanya sa mga Sugbuanon human sila nagkumboya og tulo ka gold ug usa ka silver medals.
Si Sombrio, nga maoy nagtimon sa grassroots program sa archery sa Cebu City Sports Commission, mipukan sa tadhan sab nga archer nga si Jennifer Chan aron pagsakmit og bulawang medalya sa compound open’s qualifying round.
Naapektohan hinuon ang iyang performance gumikan sa injury sa iyang abaga hinungdan nga naka-silver lamang siya sa Olympic round.
Sa recurve cadet boys, ang pambato sa Cebu Archery Club nga sila si Sebastian Alex Blanco, Rogelio Miguel Tremedal ug Kaine Lorenzo Casquejo miangkon sa unang tulo ka puwesto, samtang si Maria Ana Isabelle Villamor nakadaog og silver sa girls category.
Sila si Rogelio Miguel Tremedal, Sebastian Blanco, Khalil Justine Abella ug Kaine Lorenzo Casquejo maoy nanghawod sa cadet boys.
Lain pang duha ka Abella nga sila si Khalil Jusper ug Khalil Alyx nalandig sa ikaduhang dapit sa recurve cub sa tagsa-tagsa nila ka dibisyon, samtang sila si Maria Ferimi Gleam Bajado ug Maria Ana Isabelle Villamor naapil sa top three sa cadet girls.
Sa final results sa Olympic round, si Gabriel Flores naka-gold sa cub boys class, si Khalil Jusper Abella naka-bronze, samtang si Khalin Alyx Abella nakamina og bulawan sa cub girls. Ang Team Cebu Archery Club-Purple Cowz nga gilangkuban nilang Sebastian Blanco, Rogelio Tremedal ug Kaine Casquejo maoy nanghawod sa men’s team competition, samtang ang SUDAC Criss maoy midominar sa women’s division. (BANAT NEWS)