6-0 ‘Sweep’ tumong sa Warriors
CEBU, Philippines – Dili lang solong liderato maoy tuyo sa wa’y pildeng University of San Carlos Warriors, apan lakip sa ilang tahas mao ang pagkulit og 6-0 sweep sa first round dihang ikasangka ang University of Cebu Webmasters sa 15th Cebu Schools Athletic Foundation, Inc. (CESAFI) karong adlawa diha sa Cebu Coliseum.
Ang duwa sugdan sa alas-6:45 sa gabii inig human sa unang sangka tali sa USC Baby Warriors ug University of Southern Philippines Foundation Baby Panthers nga magtigi sa alas-5:15 sa hapon. Ang Warriors lab-as pa gikan sa ilang pagtumba sa University of the Visayas Green Lancers, 89-79 nga nagtukmod sa unang dapit sa liderato bitbit ang 5-0 nga baraha.
Posibleng mapun-an na sab ang ilang daog tungod kay ang sangkaon nila mao man ang huyang nga University of Cebu Webmasters, kinsa nagbitbit og 2-2 win-loss record.
Bisan tuod sila ang paboritong title contender, ang Warriors dili gihapon mokompiyansa ngadto sa Webmasters sa ilang duwa karong gabii.
Hinuon wala gyu’y nasayod kun unsaon pagpukan ang Warriors karong higayona ilabi na kay nagka-umento ang ilang duwa ilabi na sa trio nilang Ian Tagapan, Shooster Olago ug Charles Pepito nga maoy nakabihag sa Green Lancers.
Gawas sa tulo, ang Warriors magsandig sab nilang Nico Magat, Victor Rabat ug Ian Ortega uban nilang Giovanni Laguyo, Christian Maconodico, Fil-Australian William McAloney, Dolan Adlawan ug Maverick Suarez.
Sa ilang bahin, ang Webmasters magsalig sab nilang Melvin Butohan, John Calvin Jabello, Joseph Mayol, Clint Suelto, Justine Dacalos ug Filvenson Culango ug uban pa. (BANAT NEWS)
- Latest
