Converters, Sharks mingkulit og daog sa E-League
CEBU, Philippines – Ang Convergys Converters ug Accenture Sharks mipakgang sa tagsa-tagsa nila ka mga kontra ubos sa Elite Classic sa 11th CSCC E-League men's basketball tournament niadtong Sabado diha sa City Sports Club-Cebu gym.
Sila si Franz Dione Dysam ug Lourenz Limpangog mitali og 15 puntos matag usa aron pagpangu sa Converters ngadto sa 67-62 nga kadaogan batok sa Sykes Pioneers, 67-62, samtang ang Accenture nagsandig sa bangis nga duwa nilang Ildefonso Bulangis, Jr. ug Archie Batua aron pagpakaging sa Wipro Tigers, 82-77.
Si Dysam mihakot sab og 10 ka rebounds, samtang si Sherwin Anghay mitipig og usa ka dosenang puntos alang sa Converters nga mingkulit sa ikaupat nila ka daog sa lima ka duwa. Bali ang nadangatan sa Sykes nga nakatilaw sa ilang ikaupat nga pilde nga gi-atbangan og nag-inusarang daog.
Samtang si Bulangis miposa og 23 puntos uban ang upat ka rebounds ug tulo ka assists. Si Batua midugang og 20 puntos, 10 ka rebounds ug tulo ka assists alang sa Accenture nga mi-inat sa ilang record ngadto sa 3-2.
Sila si Clifford Amartado ug Franz Martinez nagkumboya og 36 puntos alang sa Wipro nga natagak ngadto sa 2-3.
Sa mga duwa ubos sa Evo League, ang Results Companies Spartans mipukan sa Teletech Titans, 63-57, samtang ang Calltek Trojans mibihag sa Contact Solutions, 80-68.
Si Jade Seno adunay 16 puntos ug 10 ka rebounds, si Kevin Gialogo mipuntos og 14 uban ang walo ka rebounds, samtang si Charles Andrew Ybañez mitampo og 13 puntos ug usa ka dosenang rebounds alang sa Spartans, nga nagbitbit na karon og baraha nga upat ka daog ug duha ka pilde.
Si Jervis Sildura misalida og maayo bitbit ang 10 puntos, 16 ka rebounds ug E-League record nga siyam ka blocks sa usa ka duwa, apan nakawang ang iyang kahago gumikan kay mingsukarap man ang Teletech ngadto sa ikalima nilang pilde sa unom ka duwa.
Miwadwad sab si Aerl Genebraldo nga mingbahug og 22 puntos alang sa Calltek, nga nakadaogan og duha pa lamang sa unom ka duwa. Ang Contact Solutions natagak ngadto sa 1-4. (BANAT NEWS)
- Latest
