CEBU, Philippines - Andam na ang tanan alang sa 21K Uphill Rush, usa ka endurance run nga gipasiugdahan sa lokal nga kagamhanan sa dakbayan sa Naga sa habagatang bahin sa Sugbo karong Agosto 30. Ang makutas apan makalingaw nga lumba magsugod gikan sa Baywalk sa Poblacion paingon sa bukid sa Cantao-an sa maong dakbayan.
Gawas sa medalya, ang mga mananaog makadawat sab og ganting salapi. Ang makampiyon sa 21K category mobulsa og P10,000, samtang ang mopahiluna sa ikaduha ug ikatulong dapit modawat og P8,000 ug P5,000.
Ang top three sa 12K mobitbit og P8,000, P5,000 ug P3,000, samtang makaangkon og premyo nga P3,000, P2,000 ug P1,000 sa 5K.
Ang lalaki ug babaye nga modagan sa 21K nga unang makaabot sa “turning point” sa bukid (10.5K) maoy pasidunggan isip “King and Queen of the Mountain.” Makadawat sila og Oakley sunglasses.
Ang rehistrasyon nagkantidad og P750 sa 21K, P550 sa 12K ug P350 sa 5K apil na niini ang singlet, race bib ug libreng pamahaw. Ang tanang finishers makadawat sab og visor.
Giorganisar sa Team Kombati, usa ka kapunongan sa mga hilig og dagan sa Naga, ang maong kalihukan tipik sa kasaulogan sa ikawalo nga kasumaran sa Charter Day sa Naga karong Septiyembre 5. Kabahin sa kita niini gamiton pagpamalit og mga wheelchairs alang sa mga molupyo sa maong dakbayan nga maglisud sa paglakaw.
Gipaluyohan sab kini sa Runnr, Cemex Philippines ug sa Carcar Amateur Radio Communicators Inc. (Carcom). Alang sa dugang mga detalye, mahimong motawag ni Clint Chiong sa 0917-320-0884. Ang mga registration forms makuha gikan sa Runnr sa Ayala ug sa City Hall sa Naga. (BANAT NEWS)