Senior citizens sa Barangay Tisa mopasiugda’g “Siomai fun run”

CEBU, Philippines - Ang Barangay Tisa Senior Citizens Association   mopahigayon   sa   labing  una nilang  Siomai  Festival  Fun   sa Septiyembre 19 nga manukad ug matapos diha sa hawanan sa Gaisano Capital-Tisa.

 Sa gipahigayong press conference kagahapon didto sa Tisa Barangay Hall, ang presidente sa Cebu City Association of Barangay Council  ug Tisa  Barangay Captain nga si Philip Zafra mapasigarbuhong mipahibalo nga sa  unang higayon  ang kahugpongan sa senior citizens sa Sugbo mopasiugda og lumba sa dagan. 

 “Kini maoy labing unang higayon nga usa ka kalihukan ang gipasiugdahan sa mga senior citizens ug daku nakong kalipay nga kita diri sa barangay Tisa maoy nag-una,” matud pa ni Zafra.

 Ang lumba gilangkuban sa 9K open, 6K ug 3K fun run alang sa mga beginners ug senior citizens.

 Dul-an sa P50,000  nga ganting salapi, tropeyo ug mga medalya ang giandam alang sa top 10 finishers sa matag kategoriya.

 Gibana-banang 400 ka mga runners lang daan gikan sa barangay Tisa ang managan ug gilauman nga daghan pa unya ang mosalmot sa lumba kun mosulod na ang mga running enthusiasts.

 Gawas sa paghatag og lingaw ug nindot nga paagi alang sa kahimsog sa panglawas, ang mga organizers sa lumba miingon nga magsilbe usab kini nga fund-raising event alang sa mga senior citizen sa Tisa.

 Bukas na ang pagpangrehistro didto sa Tisa barangay hall ug sa Philippine Sports Commission office sa Cebu City Sports Center.

 Ang registration fee nagkantidad og 350 sa 9K, P300 sa 6K ug P250 sa 3K.  (BANAT PALARO)