Target sa Warriors
CEBU, Philippines – Pahugtan sa University of San Carlos Warriors ang paghupot sa ikaduhang puwesto dihang ilang atubangon ang Cebu Institute of Technology-University Wildcats sa 15th Cebu Schools Athletic Foundation, Inc. (CESAFI) men’s basketball tournament karong gabii diha sa Cebu Coliseum.
Sa juniors division, magbuwag karon ang dalan sa University of the Visayas Baby Lancers ug ang University of Cebu Junior Webmasters sa pasiunang duwa nga sugdan sa alas-5:15 sa hapon.
Sa kasamtangan, ang UV ug UC parehong nagbitbit og 2-2 win-loss records nga nalambigit og triple-tie uban sa University of Southern Philippines Foundation Baby Panthers.
Taas karon og espiritu ang Wildcats kinsa nakatangag sa labing una nilang daog sulod sa upat ka duwa niadtong Sabado pinaagi sa pagpilde sa UC Webmasters, 92-87 sa labing unang overtime sa liga karon nga season.
Apan tungod kay wala’y import ang Wildcats, tataw na kaayong maglisud sila kun unsaon pagpugong sa Warriors.
Bisan pa tingali og dili pasudlon ni coach Britt Reroma ang ilang import nga si Shooster Olago, dili gihapon sila bentahaan sa Wildcats tungod kay duna pa sila'y duha ka bigmen nga parehong kugihan sa ilawom nga silang Charles Pepito ug William McAloney.
Depensa maoy usa sa mahait nga hinagiban sa Warriors ug mosamot ang ilang bentaha kun mangigo sa ilang outside shooting silang Nico Magat, Victor Rabat, Ian Ortega ug Ian Tagapan.
Mas gagmay man tuod ang point guards sa Warriors nga silang Kiefer Lim ug Giovanni Laguyo kun itandi nilang Steven Bucao, Marlo Pono ug Wilkins Sanchez sa Wildcats, apan dili sila dehado sa ‘transition defense’ tungod kay mas teamwork ang Warriors.
Ang scoring machine sa Wildcats mao si Joshua dela Cerna kansang 34 puntos maoy nahimong yawi sa ilang kadaugan batok sa Webmasters.
Manghinaut si Dela Cerna nga kanunay siyang abagan ni Allan Dimco sa opensa ug ingon man ni John Lucena.
Sa laing bahin, manikaysikay na sab karon ang Junior Webmasters aron kaluhaan ang ilang 83-64 nga pagdabo-dabo sa Wildkittens niadtong Sabado samtang samaran pa ang Baby Lancers, kinsa napilde batok sa Sacred Heart School-Ateneo de Cebu Magis Eagles, 64-73 sa mao gihapon nga adlaw. (BANAT NEWS)
- Latest
