Houston star ug ang 3 stripes

Didto sa NBA, dili lang sila pasikatay sa duwa ang gihimo sa mga players, pasikatay pa gyud sila'g sapatos.

Atong hisgotan karon sa Sportsgab ang hinungdan nganong bisan sa pag-endorse lang og brand sa sapatos, mahimong ma-corrupted ang usa ka player. Akong gipanglista ang pipila sa mga inilang brand sa sapatos ug ako mismo nakalitan sa akong nalista kay NACURAP man hinooy naporma---Nike, Adidas, Converse, Under (armour) Reebok, And1 ug Puma.

Kini kaha si James Harden sa Houston Rockets, wala kaha kini ma-corrupt? Wala tingali siya ma-corrupt sa iyang pagka-player sa Rockets apan kining iyang pagbalhin sa Adidas may kalabotan gyud kini sa simbolo nga $.

Usa sa tulo ka teams sa Texas, (Dallas, Houston, Sa Antonio) ang gitawag og Lone Star State, nagduwa ang usa ka literal nga bitoon ang hayag kaayong misubang o walay lain ang  star ug franchise player sa Rockets nga si Harden nga gitawag sa mga fans og "Fear the Beard."

Gikan si Harden sa kompaniyang Nike diin tulo sa labing mga inilang NBA players maoy mga endorsers nga naghatag kanila'g minilyon nga salapi ug sila mao si Michael Jordan, Kobe Bryant ug LeBron James.

Daghan nang mga NBA players ang gihimong mga endorsers sa sapatos ug tungod lagi sa ilang kasikat, makatabang kini sa pagpa-usbaw sa halin sa sapatos nga ilang gi-endorsar.

Usa ako sa mga fans ni Harden kaniadto sa didto pa siya nagduwa sa Oklahoma City Thunder ug gani hangtod karon, dili pa ako malimot sa iyang mga tirada ug mga lusot-lusot aron pildehon ang San Antonio Spurs sa Western Conference Finals kaniadtong 2012 season.

Dugay na kaayong nailhan ug na-establisar na sab pag-ayo ang Nike isip usa ka dominanteng shoe and apparel company sa natad sa basketball diin sila maoy naghupot  sa pipila ka mga players nga inila sa tibuok kalibotan ug tungod sa ilang pagka-gamhanan, makahimo sila paghukom diha-diha nga dili mahimo sa uban ug kini naglakip sa pagtugot nga mobalhin si Harden, ang MVP runner-up ug All-NBA mainstay sa pagbiya ug mitapon sa karibal nga kompaniya nga walay daghang langas.

Nabaniog na sa miaging semana nga buhian na si Harden sa Nike ug adto kini mobalhin sa Adidas. Gikan sa "swosh" ngadto na sa "three stripes" ug natinuod ang maong hungihong ning semanaha.

Si Harden, kinsa adunay jersey no. 13 sa Rockets, gitanyagan sa Adidas og kontrata nga 13 ka tuig balor og  200 million dollars. Ambot gituyo ba kini nga  13 gyud ka tuig kay lagi kuno kining numero 13 lucky o swerte.

Kung doblehan sab kining `13 mahimo kining 26 nga maoy edad ni Harden. Daghang mga sulagma o coincidences kining maong pagtapon ni Harden sa Adidas gikan sa Nike. Kining iyang hilabihan ka taas nga kontrata posible pang molanat hangtod ngadto sa iyang pagretiro sa basketball.

Nahimong opisyal ang pagbalhin ni Harden ngadto sa Adidas kaniadtong Huwebes dihang mipahibalo silang duha nga nagkasinabot na sila sa mga termino o kundisyones nga nalatid sa maong kontrata.

Duna hinooy katungod ang Nike nga tugbangan ang tanyag apan nagdumili ang maong kompaniya ug matod pa sa Adidas sa usa ka mensahe gikan sa SneakerNews.com, ila nang nakumbensir si Harden sa pagbalhin isip partners.

Sugdan ni Harden ang iyang long-time nga kontrata isip endorser unya sa Oktubre 1 diin sa maong buwan, mao sab ang pagbukas sa 2015-2016 NBA season sa kataposang semana sa Oktubre.

Ang maong pahibalo naggikan kang Chris Grancio, ang Global Basketball General Manager sa Adidas.

Ilang ginganlan si Harden og usa sa labing iladong personalidad sa natad sa basketball ug makita kini sa iyang duwa, sa hitsura, sa iyang paningkamot aron modaug ug ang iyang istelo "on and off the court."

Sa pagsugod sa ilang partnership, bug-at nga papel ang dad-on ni Harden alang sa Adidas’ global brand campaign. Gawas pa sa pag-endosar sa sapatos nga Adidas, lakip sa iyang papel mao ang pagbiyahe-biyahe  sa nagkalain-laing dapit sa Europe ug Asia.

Si Harden usa lang karon sa mga endorsers sa Adidas nga naglakip sab kanilang Derrick Rose, John Wall, Damian Lillard ug Rookie of the Year awardee nga si Andrew Wiggins.

Si Harden na karon maoy labing marketable o "halinon" nga endorser sa sapatos.

Makita na kanunay si Harden sa mga commercials o advertisements sa branding efforts sa  Adidas sa ilang pagsuway paggawi sa kantidad sa ilang investment.

Ang Nike pa gihapon maoy numero uno sa tibuok kalibotan pinaagi sa dakong labaw apan ang ilang labing dako karon nga kumpetensiya aduna na'y superstar nga modala sa umaabot nga gubat sa sapatos-- maayo na lang kay sapatos dili armas de fuego o kanyon.